› 選擇地區
三藩市
紐約
洛杉磯
其他美國地區
香港 台灣 北美
 
2015年07月31日

一周三件:中信低位等爆 - 錢雋

常振明任主席的中信股份,股價大落後。 資料圖片

中信股份(267)獲阿媽注資後,同另一間同樣係祖國大孖沙嘅光大控股(165)變得幾近磅。後邊光大就算計埋今個月頭以嚟大插水,一年仍累升48%,中信講緊累跌10%,殘到不堪入目!
中信經改組同注資後,金融資產達到5萬億元,兼成為集團業績增長同資產大升值嘅領頭軍,兼煥然一新,而集團對口又係國務院,穩陣到爆。但中信現價(13.82元)同1998年亞洲金融風暴、2003沙士底,唔係真係差太遠,中信係超落後。

引入猛人股東

場內專業評估,中信今、明兩年EPS 2.15同2.3元,預測PE得6.4同6倍,光大兩年預測7.3同6.5倍PE。又銀行瓣數佔中信業務大比重,亦以呢瓣做比較,祖國內銀明年平均預測PE,都係6.4倍,中信平咗截。仲吸引係中信往績0.82倍PB,今、明兩年預估0.73同0.65倍PB,光大明年預估0.75倍PB,內銀預估平均0.87倍PB,中信折讓咗26%。
中信繼今年初引入泰國正大,同日本伊藤忠兩位大孖沙做股東,啱啱呢個月17日,上海A股雅戈爾(滬600177)亦計劃以每股13.95元,認購中信近8.6億股。呢次雅戈爾出資達到120億元,每股認購價,比中信當日收市價13.66元,有輕微溢價。報載雅戈爾就係睇中中信基本面吸引,有大折讓,所以先瞓身。再睇紀錄,雅戈爾原來亦係股壇高高手,去到呢個月中,企業出售可供出售金融資產,累計投資收益近12億元人仔。呢轉雅戈爾計劃煲重中信,對中信有幾大信心,唔使多講。
中信係咁意追番上內銀明年平均PB,現價講緊要升33%,到18.5元。若果扑中開大,中信試番幾潮牛市高位50蚊,講緊要升265%,班大孖沙就肥仔水。

錢雋
細價股專家
本欄逢周一、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載