› 選擇地區
三藩市
紐約
洛杉磯
其他美國地區
香港 台灣 北美
 
2015年08月06日

財經評論:黎大鈞去哪兒

61歲嘅黎大鈞,唔知之後會唔會去創業呢? 資料圖片

傳媒早已預告,明天數碼通(315)總裁黎大鈞將親自督師其「吻別」記者會,推介被視為是他最後一個baby的電子錢包平台服務,用「吻別」形容一點都不誇張,皆因黎大鈞將於今個月尾就同數碼通講bye bye,這次隨時是他最後一次以數碼通總裁身份站台見傳媒。
聽講數碼通員工私底下都會以「阿公」稱呼黎大鈞,大概因為全公司都是他話事,除了在公司話晒事,「阿公」面對傳媒時亦以霸氣見稱,遇到一些「備課不足」記者的提問,「阿公」會毫不修飾(可能已修飾咗)地直斥記者,假如周四有人問「阿公」:「上星期,李澤楷的香港電訊(6823)率先宣佈推出電子錢包,你覺唔覺得被人搶咗頭啖湯?」「阿公」可能會答:「你識唔識㗎?!我哋嘅服務係畀每個市民下載使用,同你講嗰間只係提供服務畀佢哋嘅用戶唔同,都費事同你講!」
是的,「阿公」就是那樣高傲、那樣直腸直肚,昔日的數碼通可能真的容許「阿公」話晒事,畢竟會計師出身的「阿公」早已加入數碼通大股東新地(016),主責企業財務,1992年「奉命」創辦數碼通,堪稱數碼通開國功臣,試問在市值3,400幾億元的新地心目中,又豈會太在意每年盈利幾億元的數碼通呢?但自從新地的郭氏家族被官司纏繞後,新地系的管理層開始出現變化,新地執董馮玉麟亦於2013年12月18日獲委任為數碼通非執董。
翻查新地2013/14年的年報,酬金最高的是賣樓的雷霆,年袋1,921萬元,至於身兼新地集團非地產相關的投資組合之行政總裁的馮玉麟,返工半年更只袋376萬元。咁「阿公」呢?同期「阿公」袋2,546萬元,多過雷霆32%,同事話「阿公」管整間數碼通,人工高啲都應該。
咁2,546萬元對於一家電訊公司又是個咩概念?期內數碼通盈利約5.37億元,大概「阿公」每袋1蚊可為公司賺21蚊。再睇另外兩家主要電訊商香港電訊及和電香港(215)的掌舵人艾維朗及黃景輝,去年艾維朗的酬金4,169萬元、公司賺30.58億元,即他每袋1蚊可為香港電訊賺73蚊;同期黃景輝的酬金1,024萬元、公司賺8.33億元,即他每袋1蚊可為和電賺81蚊,以這個標準去秤,黃景輝完勝,「阿公」就……
值得注意的是,61歲的「阿公」是三大電訊公司掌舵人中最「年輕」,根據聯合國世界衞生組織對年齡劃分標準作出的新規定,未夠65歲的「阿公」仍屬青年人,市場人士都估「阿公」未會言退,但相信他未必會效力另外一家電訊公司,咁「阿公」將會去哪兒?筆者建議,青年人最好就去創業啦!

記者:石永樂

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載