蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年08月10日

中環在線:話你有性格
其實叫你唔好撈
《小人國》導演踢爆上司心聲 - 李華華

有無諗過,上司忽然好聲好氣問你「最近係咪有心事呀?」係真心關心你,還是另有諗法呢?W創作社前年炮製舞台劇《小人國4》,其中一段「卸膊操」熱爆YouTube,擊中唔少打工仔嘅心聲,今年《小人國5》加一段「謎語操」更爆笑,老闆假意關心,其實心裏係話「你最近做嘢好唔掂」,呢段片如放上YouTube,肯定更爆。

相關新聞:中環在線:教如何演繹腳痛跌低

【老闆日常「 謎語 」】

卸膊操引起打工仔共鳴

W創作社創辦人兼《小人國》導演黃智龍喜歡用生活化嘅題材,創作《小人國4》時,大家興起跳鄭多燕,佢想以寫字樓做題材創作其中一段,諗起打工仔最憎人卸膊,佢以自己經驗,度咗9句口訣,配合鄭多燕式動作炮製「卸膊操」,例如低層卸膊時,鍾意講「我真係唔覺得我錯囉」,高層卸膊就會講「我冇印象我有咁講過」,聽落似曾相識。
今年佢推《小人國5》,原先冇打算做「卸膊操」,佢覺得再做「好娘」,後來俾佢搵番另一堆口訣。原來佢做完《小人國4》,隨即有「謎語操」idea,想講上司口講與心講嗰句。
好似上司喺放工前話「可唔可以傾多5分鐘」,實際上係叫你「搞掂先至好收工」;表面話「你都好有性格喎」,其實心裏躁底鬧爆「咁×勁就唔好喺度撈!」
「卸膊操」加「謎語操」放喺《小人國5》最尾,扮上司嘅王菀之有份參與演出,輕易引起觀眾共鳴人人笑住走。
《小人國》系列由2007年開始第1集,做到今年第5集,觀眾總數由5,000人,到今年2.5萬人,表演場地由壽臣劇院到演藝學院,當然唔係單靠「卸膊操」與「謎語操」。
《小人國》之所以受歡迎主要因為劇中,每個故事都與市民息息相關,能產生共鳴,雖以喜劇手法演繹,少少胡鬧,但又引人深思。《小人國5》仲有講大家今日離不開手機,唔少人無常識又鍾意四圍投訴等等。
黃智龍今次專登減少政治題材,唔係怕,而係佢發現社會氣氛轉變,大家目前覺得好累,好想歇一歇,觀眾會覺得「現實面對嘅困局,改變唔到,入去劇場提番我又點呢?」
的確,荒謬事情無日無之,大家最需要可能係開懷大笑一下。

相關新聞:中環在線:王菀之扮刻薄上司好神似

黃智龍曾任傳媒老總

黃智龍1999年成立W創作社,包辦編劇與導演,至今推出28套舞台劇。佢之前喺傳媒工作,《蘋果日報》創刊時負責娛樂版,之後曾任《忽然1周》與《飲食男女》總編輯。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載