› 選擇地區
三藩市
紐約
洛杉磯
其他美國地區
香港 台灣 北美
 
2015年08月11日

魚樂無窮:一單刁兩個遐想 - 唐牛

英皇證券有炒作主題。圖為集團董事總經理楊玳詩(中)。 資料圖片

噚日單睇指數表現,以為又係悶市一場,但國企改革概念其實炒到啪啪聲。中央打造神船,其餘板塊一湧而上,由航運、鐵路、基建,到鋼鐵、煤炭、軍工。內銀H股唔爭氣壓住指數,但A股就衝高5%,企穩3900點。
阿爺暴力救市後,中港股市吹無定向風,玩死唔少股民。不過,今次升市有兩點值得尊重,有權玩耐啲。第一,有主題。股災後一直欠缺投資概念,入場都唔知搞乜好,如今焦點再現,有力吸引進取資金入市,令概念無限延伸。第二,有成交。A股兩市成交重越萬億人仔,港股方面亦去番800億元,加上港交所(388)自動波炒上,聞到陣陣炒味了。
今日推介英皇證券(717),同樣貪佢有炒作主題。大膽假設成交續升,券商股肯定最受惠,英皇證券大時代期間有幾勁唔使多講,要炒一定炒佢先。公司上周五宣佈,大股東楊受成將4%股權轉讓予獨立第三方,每股作價0.63元,通告稱為中國最大金融機構之一,一單刁兩個遐想︰一、4%未夠現真身,可憧憬增持陸續有來;二、前稱新傳媒嘅恒大健康(708),控權由楊受成轉至許家印後,逆市連環破頂,今次楊受成減持英皇證券,是否另一大製作?值得期待。再講,英皇現價0.81元,比起7月配股價0.88元,依然低水8%,五個字︰贏在起跑線!

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載