› 選擇地區
三藩市
紐約
洛杉磯
其他美國地區
香港 台灣 北美
 
2015年08月11日

中環在線:李澤鉅今鬧市現身
罕有出席屈臣氏店開幕 - 李華華

屈臣氏喺銅鑼灣呢間旗艦店噚日已開業,等大老闆李澤鉅光臨。

有「小超人」之稱嘅李澤鉅今日「出巡」呀!大家可能有所不知,小超人甚少喺公眾地方公開露面,傳媒平時見佢,主要都係兩、三個地方,包括中環長江中心、紅磡海逸君綽酒店,同埋柴灣佛教墳場(拜祭亡母)。屈臣氏集團全球第1.2萬間店舖今日喺銅鑼灣開幕,小超人竟然決定為呢間舖高調喺鬧市現身,認真罕有!
小超人一向錫身,早有傳聞話佢太太走去學剪頭髮,目的就係可以親自幫小超人理髮,唔使小超人成日出街幫襯髮型屋;舊年中有人影到小超人去中環剪髮,當時都有兩名保鑣貼身保護。今日下午佢現身銅鑼灣鬧市,可以估計保鑣陣容應該幾龐大,分分鐘唔少路人甲、乙、丙都係佢嘅保鑣。

霍建寧無份出席

呢間屈臣氏舖請得郁小超人當然唔少嘢,被稱為屈臣氏香港旗艦店,好巴弊!其實屈臣氏多年前喺銅鑼灣京華中心都有間大舖,後來被時裝品牌Forever 21搶租,傳聞等到今年4月左右,先以月租250萬元租落呢個舖,地下連1、2樓共1.05萬平方呎,變成旗艦店。
值得留意嘅係,長實與和黃今年合併做長和(001)之前,老臣子霍建寧一向都係負責和黃嘅電訊與零售業務,喺佢策劃下,和黃舊年初就以440億元向淡馬錫出售25%屈臣氏股權。長實與和黃合併後,霍建寧𠵱家係長和聯席董事總經理,今日屈臣氏旗艦店開幕禮竟然冇霍建寧份。
霍建寧做得打工皇帝,果然識做,適當時候就畀老闆威威。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載