蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年08月21日
馬上成為壹會員

每日一趣:國家隊救市得啖笑 - 黃尹華

而家A股炒來炒去,得番一個證金概念有得炒。 資料圖片

而家A股炒來炒去,得番一個證金概念有得炒,凡係證金公司有入股,股價就可以飛升。但究竟證金用乜嘢準則選股,全世界冇人知。內地全部都黑箱作業,好多投資者懷疑,其實證金公司已成為最大的老鼠倉,呢班所謂國家隊成員,用萬億公家籌碼,幫自己友散貨,肥水源源不絕。唔信?請看以下例子。
A股呢期風頭最勁股份,叫梅雁吉祥(滬600868),該股冇業務、冇盈利,係一隻不折不扣的殼股。公司8月4日公佈,獲得證金公司入股,十個交易日暴升150%。身負救市重任的證金公司,為咩事要去買一隻殼股?
更加騎呢係,公告話,證金公司只係買咗980萬股,持股佔0.52%,就竟然已成為第一大股東!即係話,原有股東已經全部跳船。呢筆交易,話冇內幕都冇人信。
另一單古怪無比的交易係恒生電子(滬600570),該公司為場外配資提供電子交易平台,被視為造成之前股災的罪魁禍首之一。中證監近期不斷話正調查其違規行為,要打要殺。恒生電子禮拜三突然公佈,原來證金公司已經買咗近5,000萬股,佔7%股權,市值超過30億元,成為第二大股東!
證金公司係中證監下屬機構,上頭話要查,要封舖拉人,但下面班人就用公家錢去大手買股,除咗想幫恒生電子管理層走貨外,諗唔到第二個理由。只不過,咁樣明目張膽喺阿爺眼皮下搵食,實在太誇張。
難怪,上禮拜五中證監要宣佈,證金公司不再入市。再搞落去,呢筆股市救命錢,可能全部落晒私人袋!

黃尹華

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載