蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年08月21日
馬上成為壹會員

中環在線:
吳宗權「被特訓」怕醜變talk得 - 李華華

吳宗權噚日好有耐心咁答記者問題。 李潤芳攝

會德豐(020)型仔主席吳宗權,大家都知佢黑黑實實、大大隻,典型陽光大男孩,仲好有禮貌㖭。之不過,唔知佢係咪少同傳媒打交道,見到傳媒通常都表現得幾拘謹,又怕醜,以往主持業績會,現場答問題多數係一句起、兩句止,想佢講多兩句都難。
噚日中期業績會,大家諗住吳宗權繼續「惜字如金」嘅作風,好難先至撬得開佢把口。
點不知到咗答問環節,無論問美國加息、地產市道,定係人民幣貶值等等,基本上由吳宗權答晒,完全冇走數,佢仲要唔止講一兩句,而係好有耐心咁答問題。
其他在場嘅管理層都好識做,等少爺仔自由發揮,好少出聲。係問到綠城中國(3900)改咗入賬方法,吳宗權先至交畀財務監督李偉中解釋,但佢自己頭尾都有補充幾句。今次突然有呢個改變,睇嚟背後可能係有公關「發功」,幫吳宗權練下點樣面對傳媒,而效果睇嚟都相當唔錯。
吳宗權本身係游泳健將,仲係「公益金會德豐百萬泳」嘅活動籌委會主席。噚日一講到游水,佢即刻笑晒口,話一定會盡力支持。

邀請記者游百萬泳

不過,佢冇透露自己今年會參加幾多項賽事,又唔講邊啲富二、三代朋友仔將會一齊落水游,反而調轉頭叫記者報名參賽,笑住話「你哋會唔會呀?有公開賽喎。」
佢之前試過同爸爸吳光正「父子兵」上陣,吳宗權就話,爸爸唔知時間就唔就到,但都知道係10月尾舉行。咁大家記得喇,到時就可以睇下一班富二、三代嘅身形,有冇弗到。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載