› 選擇地區
三藩市
紐約
洛杉磯
其他美國地區
香港 台灣 北美
 
2015年09月02日

一周三件:慶鈴鐵底可撈 - 錢雋

慶鈴汽車今年上半年盈利增長近11%,到2.65億元人民幣。 互聯網

慶鈴汽車(1122)唔只銀彈多,啱啱派半年成績單,盈利有唔錯雙位數增長,食住基地增長優勢,應該keep住good fit,睇睇。

穩收8厘高息

慶鈴今年上半年,盈利增長近11%,到2.65億元人仔。呢期業績,以輕型商用車增長最勁,分部溢利翻過半番到1.47億元人仔。之前提過,重慶市今年上半年GDP增長11%,增幅係全國首位,活動十足。慶鈴基地正正係重慶市,集團商用車增長咁爆炸,同地區經濟不無關係。又睇往績,重型車唔係慶鈴主要搵銀瓣數,但最新半年報告,慶鈴重點提到,要抓好重型車網絡建設工作。咁睇,重慶市係一帶一路重要支點,隨住市政府大力投放基建,投資上萬億元,相信亦會帶動重型車需求,慶鈴配合國策出擊,繼續有運行。
慶鈴到今年6月尾,揸淨現金39億元人仔,折約47億港元或每股近1.9元,係現價(2.49元)75%,防風力特強,係咁意估慶鈴今年盈利增長,只係keep住上半年11%水位,到4.93億元人仔,超級銀彈下可以穩收慶鈴起碼8厘高息。
又場內專業評估,慶鈴明年預估0.65倍PB,場內行家,華晨(1114)1.46倍PB、長城汽車(2333)1倍、吉利(175)0.93倍,而中資行家平均1.8倍PB。慶鈴係繼東風(489,預估0.59倍PB)之後,PB至抵搞汽車股。呢轉睇住慶鈴近兩年橫行鐵底2.23元,再跌喺呢個位兜轉,到時慶鈴息率回報去到8.6厘,仲吸引。又當慶鈴翻四分一番到2.78元計,先得0.7倍PB,未有耐上到行家平均值。

錢雋
細價股專家
本欄逢周一、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載