› 選擇地區
三藩市
紐約
洛杉磯
其他美國地區
香港 台灣 北美
 
2015年09月08日

金手指:防梁外洩港私隱 - 孫柏文

特首梁振英任期得番兩年。 資料圖片

特首梁振英任期,得番兩年。根據博弈論,梁特首派最着數係令香港人越反對佢哋,就越有中央支持。香港越變大陸,就越多人嬲,所以梁特就暗種政策為他朝派系利益鋪路。
用史密夫嘅「分工論」,如果香港越做到內地做唔到嘅事,即係越有用,中央就越保存香港。

誰是恐怖份子

一個好典型梁派博弈,大家要出力防嘅草案,就係已經提交立法會、畀境外政府來港向香港證監會攞投資者資料嘅法案。政府sell到連我女神青姐胡孟青都話香港要「避免淪為洗黑錢中心」所以要支持,更話香港一路尊重私隱唔要人申報鈔票出入「形同冇掩雞籠」,仲話我哋「被評為不合規」阻止恐怖份子及其他犯罪份子!
青姐,晚輩孫柏文今次只係想提提你,當年砵甸乍定落「香港要做自由港」,唔係啲崇高理想,而係出於保住香港嘅realpolitik。
你話香港要「阻止恐怖份子」,咁乜係「恐怖份子」?清朝眼中嘅孫中山算唔算?你打孫中山融資,你估1911年時香港會點?咁民國年代嘅中共呢?根據陸恭蕙話,1949年前,中共最大嘅華南基地喺香港,如果你聽國民黨話剿共匪,建國後你估香港點?
今日「恐怖份子」,可能他朝變「國父」。歷代官員們都知冇青姐你嘅落注能力,所以唔做嘢。而唯一可以唔做嘢,就係連知都唔知。香港捱到百幾年,背後係有高深嘅博弈保護呢個奇蹟。
青姐,千其唔好成為彭定康最尾份施政報告中「一點一滴地斷送自主權嘅香港人」。各位立法會議員,唔好俾證監分享我哋啲資料。如果唔係,到時人民幣滙港元或拋空A股,都算係恐怖活動,喺香港做,境外政府都知,梁派最着數。

孫柏文
獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載