› 選擇地區
三藩市
紐約
洛杉磯
其他美國地區
香港 台灣 北美
 
2015年09月16日

魚樂無窮:磚頭爆惡性循環 - 唐牛

樓市氣氛急轉直下,地產股開始有辳味,進取嘅可以逢高造淡。 資料圖片

股市淡靜,樓市成為廝殺新戰場。藍籌屋苑瘋狂劈價,部份成交前後相差達七位數字,相當於一個上車盤嘅首期,非常嚇人,亦應驗本欄早前所講,樓市莊閒正式執位,買家重奪成交價話事權。
樓市氣氛急轉直下,租金亦開始捱唔住,太古城三房戶最新月租僅2.35萬元,低市價逾一成,與旺市兩房租金有得揮。樓價以往一直高企,某程度上因為租金同樣硬淨,業主賣唔出可轉租,每月依舊有豐厚回報。假若今次租金回落形成趨勢,樓價想唔跌都幾難。試想想,租金下跌,磚頭回報率變相降低,需求同樣會下跌(無殼蝸牛轉買為租+投資客卻步),價格最終抵受不了地心吸力,嚴重者更會形成惡性循環!用番炒股術語,一隻股派息減少,股息率下跌,股價自然要跌,內銀股跌跌不休,正正因為市場預期壞賬增加,未來派息會大幅削減,形成現時假高息嘅現象。
咁今次樓市會唔會出現惡性循環呢?不妨從經濟環境量度︰企業裁員步伐為沙士後最快、旺區吉舖處處、自由行消費力大減,香港可謂危機四伏,打工仔飯碗隨時不保,低失業率將成過去式,代價最終會在樓價反映。作為股民可以點做?噚日地產股開始有𤓓味,唔想輸錢嘅唔好亂撈,穩陣嘅避之則吉,進取嘅可以逢高造淡,講完!

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載