› 選擇地區
三藩市
紐約
洛杉磯
其他美國地區
香港 台灣 北美
 
2015年09月16日

炒家陳清白憂衰過97

兩個樓市炒家,對後市反應各異。

【樓價預測】
兩個一代樓市炒家,走過97,捱過沙士,今日頻現撻定蝕讓,再訪97過來人,現今市況是否當年翻版?
「白旋風」陳清白認為今次跌得比97更大鑊,「玩具鄭」鄭躬洪坦言唱衰多年,但相信樓市未大跌。同步經歷樓市十八年,今日兩人意見迥異。
人稱「炮哥」陳清白表示:「今次比97年,應該會大鑊啲,經濟明顯轉壞,人工追唔上樓價,樓價過高,美國千祈唔好加息,一加息,就是觸發點。」他又認為:「97年跌三分二,以太古城為例,𠵱家比97年升超過1倍,跌返三分一,真係一啲都唔奇!」
炮哥說:「唔覺今日有乜好過97年喎,睇吓𠵱家啲營商環境,好似近期啲吉舖真係多到你唔信,灣仔莊士敦道、銅鑼灣波斯富街,從來都未見過咁多吉舖,營商環境有幾差……」銀紙貶值,磚頭保值,他無奈道:「97年我都咁諗,結果?一鑊熟囉!」二手癱瘓,「揸住樓嘅,其實心急,越平畀個買家,個買家越走……轉角市,你劈一成,真係冇人買,仲嚇親個買家,我撞個板啦!你越減,越冇人買,𠵱家賣到樓嘅業主等於中六合彩。」

相關新聞:英皇終極棄租羅素街舖王

鄭躬洪料樓市難大跌

至於另一炒家,曾執幾十件九龍站豪宅,以生產玩具出身的鄭躬洪反而認為:「個市唔會有好大調整,起碼唔會係今年。第一,利息仲低,要加,美國一定唔會每個月1厘、1厘咁加。第二,剛性需求尤在,跌極有限。加埋二手市場企得好硬淨……有都係小調整,細價樓估計5%,有啲人心驚,咪平少少賣咗佢囉,跌10%我都唔覺會。至於豪宅更加唔使講,今年仲升返。」
雖然近期樓市頻現撻定,鄭躬洪認為:「最近股市唔係幾好,總會有人驚,驚咪有人死囉,但呢啲係絕大少數囉!」
雖然現時借貸率遠低於97年,炒家已經離場,不過始終香港現時經濟是自2003年以後十二年以來最差的環境,樓價升了多年,今年是最受考驗,預期樓價會下跌5%,最差會下跌30%。

【炒家對市況睇法】

綽號「白旋風」陳清白:「近期環海.東岸有連環撻定,係因為呢個樓盤出九成半按揭吸引買家入市,即係話攞幾十萬出來就上到車,嗰班友恨樓恨到發燒,想做業主好耐,家吓十零萬可以做業主,就被𠱁去買……結果咪一時衝動,買咗!」

相關新聞:大埔豪宅劈價千萬拍賣

綽號「玩具鄭」鄭躬洪:「過去幾年,我都係講緊個市好高呀,幾年前已經話調整,盡量沽晒啲貨,留番啲長線收租。我不嬲都係唱衰,但就唱唔衰,呢幾年仲有升。雖然睇淡,但唔認為個市會有好大調整,起碼唔會係今年。細價樓估計跌5%,跌10%都未必會。」

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載