› 選擇地區
三藩市
紐約
洛杉磯
其他美國地區
香港 台灣 北美
 
2015年10月06日

中環在線:滙控企業傳訊部一拆二
對外事務收歸范智廉管理 - 李華華

滙控(005)近年成日改組,最新消息係,跟傳媒關係密切嘅企業傳訊部重組。據聞上月底,內部已發出通知,主要係將部門一分為二,分為對外與對內兩個部份,對外部門由以往行政總裁歐智華負責,轉咗畀主席范智廉。
重組後,企業傳訊部會一拆二,其中主管傳媒兼NGO關係嘅新部門,用番多年前集團叫開嘅舊名──公共事務部(Public Affairs)。最得意係,日後統領呢個部門嘅環球公共事務主管,直接向主席范智廉滙報,唔同𠵱家向行政總裁歐智華負責。

高沛賢睇埋僱員通訊部

另一分拆出嚟嘅部門,叫僱員意見及通訊部(Employee Insight And Communications),負責對內員工溝通,歸由年初先升任集團環球人力資源主管、兼歐智華親密戰友高沛賢(Pierre Goad)領軍。
Pierre原來兩個月前已再上層樓,晉身為12位集團常務總監之一,與滙豐銀行副主席兼行政總裁王冬勝、環球炒房阿頭安思明等同級。
曾任職《亞洲華爾街日報》嘅Pierre,財經記者出身,做到歐洲最大銀行人事部阿頭,統領集團全球25萬員工嘅人事佈局,仲入埋滙控最高行政管理聖地,認真巴閉。
講開Pierre,9月底先同佢在港主持town hall解畫、執掌環球企業傳訊主管唔夠1年嘅Mederd Schoenmaeckers,做埋10月就拜拜嘞,集團亦已搵到接替人。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載