› 選擇地區
三藩市
紐約
洛杉磯
其他美國地區
香港 台灣 北美
 
2015年10月06日

七級偽術:不如轉行做博客 - 彭瑪莉

部落格好使好用,公眾人物用起微博來,更是出神入化。 資料圖片

如果再有人問 :「咁早退休做乜先?」Mary已經想好答案,一於話,寫blog囉,唔知有冇人睇㗎,咁咪試下自己在資源匱乏下,識唔識market自己囉。
話唔定創作個角色畀自己,寫寫下,俾行內人賞識,好似𠵱家啲知名博客,呃餐飯仔食下,得閒收番啲贈品,幫補下退休生活都唔錯呀。
部落格今天真係好使好用,商品有商品用,個人有個人用,公眾人物用起微博來,更是出神入化。
真拍拖、假拍拖、暗示拍拖、甩拖、扮分手、真復合、晒命、傳婚訊、宣佈離婚、疑似同床、向情敵晒命、稱兄道弟、扮住兄妹偷情、懺悔、解畫、扮死狗、博同情、插小三、兇元配、自製新聞、自製危機、宣傳、反宣傳……總之群魔亂舞、目不暇給。官員更是愛死它,司長局長個個化身鍵盤戰士,佢照寫你照登,講到觀點又唔使俾人兜口兜面窒到口啞啞,你說何樂而不為?彷彿當年是由任總開始的,佢肯講後巿點點點,人人都爭住聽。
一方面有記者認為官員寧願寫網誌都唔同傳媒直接交流,是新聞自由大倒退,可是那邊廂,又有傳媒建議高官網誌最好星期日幾點之前出,方便各媒體引用云云,哈,有時官員媒體又幾合作喎。
說起網誌,Mary覺得近來最莫名其妙是唐唐撐超人那一篇,何必呢,欠人很多人情嗎?不然無端端做乜諸事八卦插手表態呢?超人使唔使你幫拖呀?成件事情予人的第一反應就是──唐唐同超人關係非比尋常,深厚得令他不惜得罪官媒也要力撐,當知道唐唐並非壞孩子田少,點會輕易發表反動言論,雖然動機未明,但二人關係之密切,確實不言而喻。

彭瑪莉
mailto:marypang2015@gmail.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載