› 選擇地區
三藩市
紐約
洛杉磯
其他美國地區
香港 台灣 北美
 
2015年10月13日

中環在線:金管局阿頭無超然地位
陳德霖被銀行索入息證明 - 李華華

陳德霖係銀行監管機構金管局嘅阿頭,都要提供入息證明。

金管局總裁陳德霖(Norman)被銀行懷疑佢嘅戶口被人用作洗黑錢,咁大件事?

防被利用洗黑錢

咁大家又唔使咁緊張,事情是這樣的。話說立法會會計界議員梁繼昌噚日朝早同Norman見面,提到𠵱家國際社會上有一個Politically Exposed Person(PEP)嘅名單,梁繼昌估計,香港官員、政客、立法會議員都榜上有名,佢哋嘅銀行戶口都會獲得銀行「特別照顧」。
Norman當然走唔甩,佢同梁繼昌講,佢喺某間銀行有一個冇用幾年嘅戶口,裏面有些少錢,但係冇提存好耐,有日銀行就打電話畀Norman,要求佢提供入息證明,仲要佢提供財富證明,否則可能要閂咗佢呢個戶口,又話佢個戶口可能被人利用作洗黑錢,幾咁大件事!
咁陳總可以點做?咪就係乖乖哋解畫囉,唔通佢諗住自己係陳總,係銀行監管機構嘅阿頭,就可以有超然地位咩?呢個世界邊有咁多超然嘅嘢吖。而陳總亦都係想講,銀行一視同仁,做得PEP,戶口有唔尋常情況,銀行一樣會出聲。
不過,講開又講,Norman平時見到傳媒就cool魔上身,不苟言笑,估唔到梁議員對佢嘅評價又好正面。原來Norman一年大約有3次同梁繼昌坐底開會傾偈,討論財經界各類熱門話題,而且相當認真,梁繼昌仲讚佢勤力㖭喎。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載