› 選擇地區
三藩市
紐約
洛杉磯
其他美國地區
香港 台灣 北美
 
2015年10月14日

中環在線:投稿表敬意 獲偶像回覆
股民公開超人答謝信 - 李華華

李嘉誠向忠實小股東親自回信。

記得多年前有首《奇洛李維斯回信》好hit,收到偶像回信的確相當高興!電盈(008)忠實小股東陳仲翔早前見超人李嘉誠不停被官媒批評,於是向報章投稿,力撐超人,噚日佢收到超人嘅答謝回信,就急不及待公諸同好。

超人自爆愛聽家駒作品

大家一時間未必記得陳仲翔是誰,呢位仁兄係電盈忠實小股東,每年電盈舉行股東會,佢一定有特別舉動或提問,令電盈老闆「小小超」李澤楷都認得佢。有一年佢就建議小小超邀請股神畢菲特入股!佢今年初喺長實與和黃合併嘅股東會上,又話希望超人可以活到113歲。
佢見到超人最近不停被官媒批評,雖然不及唐英年、香港潮屬社團總會公開撐超人咁有代表性,但係都要出一分力,於是投稿去一份報章,題為「我最尊敬的人是李嘉誠」,內文提到佢好尊敬Beyond前主音黃家駒,但係最尊敬都係李嘉誠云云,篇稿上周六刊登。
陳仲翔噚日收到超人嘅答謝回信,就主動爆料,將封信公諸同好。令人意想不到嘅係,超人喺文首竟然話自己對黃家駒的歌與詞,都常有觸動,估唔到87歲嘅超人都有聽Beyond嘅歌喎,唔知超人有冇得閒哼番首《海闊天空》呢?超人又呻咗幾句,指近排嘅風風雨雨令人詫異,但佢相信教育可以幫到忙。雖然呢封信印有「李嘉誠用牋」,又有超人簽名,但華華都要向超人嘅公關大員求證,獲確認係超人嘅回信。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載