› 選擇地區
三藩市
紐約
洛杉磯
其他美國地區
香港 台灣 北美
 
2015年10月16日

中環在線:
盼新世界業務全面引入藝術
鄭志剛為Art考起高層 - 李華華

鄭志剛提出The Artisanal Movement嘅5個元素,隨時考啲高層。

城中富二、三代當中,最富藝術感肯定係新世界發展(017)接班人鄭志剛(Adrian),佢搞商場K11以藝術掛帥,亦支持新晉藝術家,近年甚至喺集團內推動「The Artisanal Movement」,希望旗下巴士、基建、地產等各業務都有藝術因子,認真考起各部門阿頭!
The Artisanal Movement嘅意思,係要做到匠心工藝,聽新世界市場推廣部嘅人所講,淨係呢三個英文字,Adrian都花咗成個下晝,不停咁寫草稿,寫咗百幾次,先寫到個啱心水嘅字形。

突擊測驗 要講出5個元素

據聞,Adrian有時踫到同事,會即場突擊測驗,考佢哋知唔知The Artisanal Movement係乜東東;對方講得出當中5個元素,都只係合格;最重要係講到點樣將呢個概念,融入生意裏面。
Adrian會跟各項業務嘅負責人開會,要班高層諗下點應用,例如點樣將新巴司機,提高到「工匠」嘅層次,認真唔講得笑。咁班高層自然唔敢怠慢,絞盡腦汁係咁諗喇。
新世界咁多瓣業務入面,最易用到工匠概念嘅,肯定係旗下樓盤。但Adrian講到明,藝術唔代表要奢華,最緊要有品味又有故事。即係唔係求其買幾件藝術品拎去擺就得。
以旺角波鞋街新盤「SKYPARK」為例,頂層設計空中花園,Adrian就係想喺旺區之中,大玩野餐、郊遊嘅概念。佢哋今年中舉行銷售活動,售樓處亦設計成花園一樣,好有feel!

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載