近年財經界不斷提高大家對女權嘅意識，港交所（388）曾呼籲上市公司委任多啲女性做董事，內部亦有個叫「女菁匯」嘅員工組織，鼓勵女性重返職場；新近輪到證監會，佢哋宣佈成立咗個女性員工小組叫「證姿薈」（好易讀錯做「姿整會」喎）。
證姿薈主要想為證監會內嘅女性與男性員工，提供平台，透過參與互動項目、培訓同埋其他活動，去提升佢哋對女性擔任領袖議題嘅興趣與認識。
唔講唔知，原來證監會係香港第一個為員工成立女性小組嘅法定機構。而證監會向來都有唔少女性員工，據佢哋嘅資料顯示，截至今年9月底，證監會有近七成員工都係女性，而總監級及以上職級嘅女性都有47%，女權相當高漲。
