› 選擇地區
三藩市
紐約
洛杉磯
其他美國地區
香港 台灣 北美
 
2015年11月12日

Money Walker:阿里衰夠有望翻生 - El.

阿里巴巴(BABA)股價最近個半月終於回氣,由9月底嘅低位至周二累升逾四成。不過睇番其他同阿里一樣喺美國上市嘅中概股,好似奇虎360(QIHU)、搜房網(SFUN)等,都同阿里一齊喺9月底嚟個V彈。
其實阿里同一眾中概股早輪有得升,好大程度上係因為投資者炒作呢啲在美上市嘅中概股,將被納入MSCI中國指數同新興市場指數。被納入指數意味住嚟緊會有大量資金流入,所以股價亦被市場預先炒高。
阿里昨日雙11嘅銷情一如既往火熱,反映中國經濟差,但以平掛帥嘅網購平台,唔受影響並不出奇。咁有望入MSCI中國指數、雙11銷情又勁,連法巴、瑞銀等大行都給予「買入」評級,係咪代表阿里已擺脫衰運呢?
近日《福布斯》有篇關於阿里嘅報道,話擁有Gucci同YSL等多個奢侈品品牌嘅開雲集團(Kering),打算控告阿里,指阿里為造假者提供銷售同物流等服務。報道仲話馬雲唔想同對方庭外和解,更霸氣表示「我寧可輸掉這場官司,寧可賠錢」。
不過股東們唔使緊張,阿里真係霸氣得起,事關佢係一間以VIE結構喺美國上市嘅企業。VIE係Variable Interest Entity嘅縮寫,係將外商投資企業同中國實體公司捆綁埋一齊嘅協議,喺該結構下,阿里資產係由其中國營運公司所擁有,外國法院對呢間公司嘅判決係無法喺中國執行。即是就算真係告得入阿里,亦未必有得賠,要告到佢破產真係唔易。
睇番阿里個股價圖,技術走勢的確有轉佳的迹象,已經衰足一年嘅阿里,今次可能真係翻生!

El.
本欄逢周二、四、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載