› 選擇地區
三藩市
紐約
洛杉磯
其他美國地區
香港 台灣 北美
 
2015年11月12日

廣告經綸:007的太陽能電筒 - 文廸晞

《Top Gun》的Ray-Ban墨鏡是植入廣告做得好的例子。

最近有個舊同事出咗嚟搞電影贊助,搵我出嚟傾吓。雖則忙到不可開交,話晒相識一場,亦可以睇吓有無互惠商機,就見個面吧!
今時今日搞植入式廣告,要講求如何高手植入而又唔多覺,將品牌定位融入故事。最近《回到未來》電影中2015年10月21號嘅未來世界喺今日出現,當年的品牌係純粹贊助性質,絕對冇人諗過會喺廿多年後Toyota可以借公關推廣一番,更找來男主角為其氫燃料電池車Mirai預熱,將當年的「時光機」帶回現在,實踐了品牌在科技開發、創新的領先價值。退而求其次,植入產品,亮麗得嚟又自然,要數007新戲《鬼影帝國》,鬼佬版「羅家英」武器發明家一角送上Omega手錶時,007問:「呢隻錶有乜特別功能?」佢好cool咁回答:「話俾你知時間囉!」當所有觀眾都預期發明家會故弄玄虛話你知一個貌似風筒而佢係一個鬚刨,一隻手錶又兼作殺人於無形的武器時,一切back to basic,估你唔到之餘又型又自然,都算係有心經營過的。
我個舊同事竟然同我sell舊到無倫嘅合作模式,例如場景後面放個logo。最致命的,套戲要2017年底先上畫,今時今日,有邊個客會有咁長遠呢?今年聖誕嘅推廣正如火如荼,出年嘅budget出年用,後年嘅嘢天知曉,到時個客仲喺唔喺呢間公司都十分存疑。講呢啲?確實有些不切實際。
植入做得好,要時間、產品、品牌與場景、故事、人物配合得宜。久遠年代已經有人做得出色,好似《E.T.》裏的朱古力品牌Reese's Pieces、老湯在《Top Gun》的Ray-Ban墨鏡、《變形金剛》中的通用汽車、今年《職業特工隊5》中的寶馬同湯唯《命中注定》中在北京及意大利出現過的Jeep等。任何年代,不管你是否來自星星,此道理想得通,連太陽能電筒都有得搞!

文廸晞
mailto:heyadmen@gmail.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載