噚日區議會選舉，撞正係長實地產（1113）為元朗新盤開放示範單位嘅日子，長實「樓神」趙國雄（老趙）盡晒公民與黨員責任，投完票兼幫手拉埋票，先至返去紅磡售樓處主持大局。
身為自由黨黨員嘅老趙，噚日上晝去所屬選區港島山頂投完票之後，就即刻喺票站附近幫黨友拉票。佢話驚掛住拉票，之後太趕唔記得投票，所以一早投咗票先。
老趙平日賣樓多花臣，幫人拉票似乎就簡單得多，佢話，拉票工作只係揸住個牌，企定定喺度，俾人睇到幾多號候選人，事關𠵱家唔可以同市民握手之類。佢幫手拉票兩個幾鐘之後，下晝2、3點就現身長實新盤售樓處嘞。
今年已經係老趙連續第三屆為黨友做拉票工作，老趙認為，區議會係為市民直接服務，絕對值得支持。
