› 選擇地區
三藩市
紐約
洛杉磯
其他美國地區
香港 台灣 北美
 
2015年11月24日

智取大市:咖喱味港股
明年喊住食 - 晉佳

區議會選舉嘅其中一個焦點,肯定係游蕙禎BB只差300票,未能成功滅鼠,距離改變現狀只一步之遙,自然有排山倒海嘅聲音湧出嚟支持,如果班傘兵全部輸成條街,大家寧願早啲瞓,就等於冇心機炒港股,連睇披露易都慳番一樣。
至於其他選區,唔少網友慨嘆,左手邊候選人係咖喱味嘅屎,右手邊候選人係屎味嘅咖喱,你嘅一票自然不能改變現狀,連嗰團火都冇埋。
區議會選舉可能得兩個候選人畀你揀,但係活躍港股點都有數以百隻計去選擇吧。不過,上星期港股氣氛有點兒好轉,但要搵到一隻連升三棍嘅股都唔易,換言之,一隻股升第一棍之後追入,你最多只能享受第二棍就要食餬;再講,唔少股升第一棍就收皮,甚至急衝半日然後即日散水亦大有股在,走勢從來最易捕捉嘅港交所(388),近期每次即市升幅接近2%,就有人派貨。你話市況好差?唔係,好炒?就更加唔係。
短炒難,坐貨又點?你首先要過到自己嗰關,幾百隻活躍股份裏面,當中可能有三成係咖喱味嘅屎,例如一批估值平嘅中資股,見到都唔想食,另有三成可能係屎味嘅咖喱,呢類股可能有概念間中有得炒吓,但睇落基本因素,亦係同屎無分別,最多短敍。
港股當中,可能又有三成係細價股,食之有味但要睇時節。細價股當殼炒,唔需要理會基本因素,奈何目前氣氛唔夠,細價股亦唔當造,又係冇啖好食。

有反彈冇升幅 寧見大跌市

剩番嗰一成,就係能夠坐得實的貨,算唔上係上等和牛,但總算係牛肉,但要喺一堆屎之中找到一碟牛肉出來,有時亦怕人多擠逼,試問有幾多隻股可以做下一隻舜宇光學(2382)?你話新股得唔得,近幾年做到爛晒,試問除咗炒殼之外,從基本因素睇,有幾多隻新股能夠成材?其實港股嘅問題係,咖喱味嘅屎或屎味嘅咖喱太多,好耐未見過上等和牛,搞到大家冇晒胃口。
呢種類似論述並非晉佳一個人講,喺前兩三個月前,晉佳同一位知名基金經理吹水,佢亦有類似看法,似乎呢種睇法喺基金界亦廣泛存在,所以,剩番最活躍嘅大戶,似乎以莊家為主。
雖然情況並非絕望,但港股第三季大跌已傷及元氣,消化蟹貨以至挽回市場對內地政策嘅信心需時,暫時估計出年只有反彈冇升幅,見到跌市反而係好事,至少肯跌先有反彈機會,至於出年最大潛在負面因素,相信來自美股,各位可回顧上一期〈智取大市〉。
未來港股除了根據氣氛炒細價股,同埋長期品嚐碩果僅存嘅幾碟和牛之外,其餘股份只能等大跌先可以買。之所以,晉佳寧願出年見到有大跌市,否則半死不生,大家唔知要餓到幾時。

晉佳
http://www.facebook.com/pages/ 晉佳/719009541518415
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載