› 選擇地區
三藩市
紐約
洛杉磯
其他美國地區
香港 台灣 北美
 
2015年11月24日

Money Walker:創科升勢料難持續 - El.

摩通早兩日出咗份報告,推薦大家出年猴年買創科(669),理由係美國經濟轉強,創科呢類出口股可望受惠。
唔少分析都認為,喺中國經濟放緩而美國持續復蘇之下,以美國為出口市場嘅股份,會成為港股熊市之中嘅逆市奇萉。不過筆者質疑,美國經濟仲可以好到幾耐,因為被視為美國經濟領先指標嘅道瓊斯運輸平均指數,已呈見頂回軟之勢。

道瓊運輸指數露端倪

筆者搵返創科上市至今二十幾年嘅股價圖嚟睇,發覺創科嘅股價走向,同道瓊運輸指數多年嚟嘅走向都幾相似吓。冇錯,兩者走勢短期會有出入,但除咗喺1999至2000年代初嘅科網泡沫時期,同埋2000年代中期,美國樓市醞釀泡沫嗰幾年之外,創科同道瓊運輸指數,兩者長期走勢少有背馳。
奇怪嘅係,美股而家明顯上升乏力而非有泡沫,但係創科近期股價同道瓊運輸指數卻明顯一升一跌,指數由去年底至今年首季一直高位橫行,至今年3月更加開始回落,不過創科股價由去年9月至今,一直反覆向上。
基於上述背馳,對於創科股價係咪可以一如摩通預測,由昨日嘅31.85元升到46元,筆者有保留。
有分析認為,國際油價疲弱係道瓊平均指數最近一年回落嘅重要原因,所以該指數最近呢輪回落,並非美國經濟將會轉差嘅預兆。不過筆者認為,油價回軟除咗因為油組同美國原油供應過剩,一定程度上亦同環球經濟放緩,導致原油需求疲弱有關。
道瓊運輸指數呢輪下跌係咪一如以往,預示美國自金融海嘯後嘅一輪經濟復蘇有機會見頂,定係純粹被油價下跌所扭曲,不妨拭目以待。

El.
本欄逢周二、四、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載