› 選擇地區
三藩市
紐約
洛杉磯
其他美國地區
香港 台灣 北美
 
2015年12月21日

笑到最後:曾司長,請為樓市減辣! - 高明

財爺曾俊華肯定會聽各方意見。 資料圖片

高明應該係全香港最早叫財政司司長曾俊華為樓市辣招減辣嘅專欄作者。早喺2014年10月10日,高明已經叫曾司長準備減辣(請Google:「請曾俊華準備樓市減辣」),因為當樓市要跌嘅時候,SSD鎖死業主,三年內賣樓要交重稅,一旦樓市下跌,新業主等錢使要沽貨,將會雙輸:蝕價又蝕稅。
當日嘅憂慮,今日終於發生,樓市現劈價潮,最傷係啱啱上車嗰批,即遇劈價潮。儲咗咁耐錢上車,冇理由見個價一跌就沽番出去,因為仲有份工頂住,失業率未有大幅上升,好多行業,特別係勞動力為主嘅工作,例如建築、飲食業仍缺人,整體上未有大事發生,公司未有藉口炒人,月尾大家仲有糧出,有錢畀供款,銀行唔會上門追債,一齊都可以依舊繼續運作。

加息後供樓路難行

不過,美國終於加息,係供款壓力增加嘅第一步,之後個市點走答你唔到,但係肯定供樓條路難咗,因為一、股市肯定唔會再牛番,少咗條財路;二、自由行條水已經尾聲,或者用個中性字「正常化」。香港人滿心歡喜,少咗中國自由行客,「歐美外國遊客」增加,但後者好愛體驗文化,首先會做「沙發客」,就算要上山頂觀光,都會選擇行上去,連纜車錢都慳番,刮沙都刮唔出啲乜,又少一條做sales財路。所謂股市行先過樓市,股票係無用之物,經濟差嘅時候係廢紙一張,連樓宇有住屋功能都比唔上。但今年A股股災之後,恒指冇一直向下插,反而喺兩萬點左右守得住,即係市場未悲觀到覺得乜都要揸現金,維持現況的話,股樓一齊慢慢陰乾機會較大。
只有經濟危機出現先會誘發插水大跌,多年香港經驗,危機主因嚟自政府施政失敗,例如八萬五或沙士處理等等,今日望住689,你都唔會對佢有期望,只可以期望作風穩健嘅曾俊華頂住。
已經上咗車未賣,高明認為已成死局,現時要折讓沽出,再去租樓,待樓價下跌後再買,要交稅及壓力測試,一來一回損耗大,一旦失業未必買得番,有能力供落去的話,唔值得賣。但每個人財政狀況唔同,政府唔應該設下關卡,令有經濟危機嘅業主無法沽樓自保。所以,曾司長,危機已到,請立即為樓市減辣!

高明
https://www.facebook.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載