› 選擇地區
三藩市
紐約
洛杉磯
其他美國地區
香港 台灣 北美
 
2015年12月21日

中環在線:恒生三賓架好唱得
馮孝忠跳住唱《狂野之城》 - 李華華

左起:梁永樂、馮孝忠及林燕勝喺恒生蛇羹晚宴大展歌喉。

銀行賓架通常畀人較為嚴肅嘅感覺,好似淨係識得講數字,但其實佢哋都有輕鬆嘅一面,好似恒生銀行(011)入面幾位高層,原來都係唱得之人,仲可以唱得好狂野,如果同佢哋一齊去卡拉OK唱歌,分分鐘見到佢哋爭咪唱㖭呀。
話說恒生早前邀請傳媒朋友去中環恒生總行食蛇羹兼玩番晚,幾位恒生高層即席大展歌喉,令人刮目相看。先講曝光率較高嘅恒生執行董事馮孝忠,大家平日只見佢評論人民幣走勢、資金流向、美國加息影響等等,查實佢唱得又跳得,蛇宴當晚,佢除咗識唱梅艷芳嘅《夢伴》,郭富城嘅《狂野之城》都難佢唔到,佢仲手舞足蹈咁跳住唱。

林燕勝唱腔似學友

事後問番馮孝忠,佢好謙咁話自己只屬「唱遊級」,玩吓就得。佢笑住話「老闆(恒生一姐李慧敏)叫我玩吓,咁冇壓力,我咪同大家玩埋一份囉」。佢跟手又為幾位同事戴高帽,指企業及商業銀行業務總監林燕勝、恒生財務總監梁永樂先係「技術型」咁話。
林燕勝的確唱得好有技巧,佢唱張學友首《你的名字 我的姓氏》,唱腔有八成似張學友,仲有震音㖭。
林燕勝自爆,由於小時候曾經係合唱團成員,所以有些少根底,佢又分享少少唱歌貼士,指「人人都識唱歌,最關鍵係點用丹田運氣,都幾考功夫㗎!」佢會多留意人哋點唱,點樣可以hold住個音,𠵱家亦不時跟朋友練歌,熟能生巧就唱得好。
至於本身聲底厚兼說話溫柔嘅財務總監梁永樂,應該係劉德華粉絲,當晚唱咗劉華嘅《十年》、《常言道》,令人聽出耳油。既然恒生咁多唱得高層,一姐李慧敏可以考慮搞番場「恒生好聲音」喎。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載