› 選擇地區
三藩市
紐約
洛杉磯
其他美國地區
香港 台灣 北美
 
2016年01月06日

收市閒情:公開推薦「洗頭艇之父」 - 千頌C

吳亮星(個老朋友)絕對係鬼才! 資料圖片

時勢造英雄,於今日資訊爆炸嘅年代,一個人有創意,全世界都搶住要!「快的」最新招聘廣告,誠徵宇宙能人異士,加入團隊出任創意總監。廣告嘅重中之重係,推薦人可獲獎金5萬大元,當然,被推薦者係要過到試用期,快的先會畀錢。5萬蚊「出賣朋友」價,又確係幾吸引,現千頌C公開推薦以下人士。

給「快的」:
你好,本人現熱情推薦、強烈建議, 貴公司撬走香港立法會議員吳亮星(個老朋友),出任創意總監一職。
原因好簡單,創意總監屬高層職位,當然要請一個行內人。雖然「快的」主打的士市場,但如果總監本身了解全港水陸兩路交通行情,相信可以幫到公司更了解行業需求。呢方面,本人拍心口保證,吳議員(個老朋友)絕對勝任!
當佢(個老朋友)有能力、有方法可向吳議員通風報信,指銅鑼灣書店股東李波同員工,係偷渡返大陸嫖妓,就知呢位人兄嘅內地人脈唔簡單!
短訊上一句「熟途老馬都知」,香港坐「洗頭艇」返大陸係唔使用回鄉卡,此正正反映吳亮星(個老朋友)正正係熟途老馬,非常熟知各路交通渠道,連中港運輸非法神秘窿路都知,相信佢絕對可以幫到 貴公司覓得新市場。
有往績有真相!吳亮星(個老朋友)一提到「洗頭艇」呢三個字,令呢種交通工具嘅名氣一時無兩,喺fb詢問度極高,大部份人一日之間長知識!吳亮星(個老朋友)可算係「洗頭艇之父」!呢種行銷手法,講得上係驚天地!泣鬼神!誠如招聘廣告所言,  貴公司冀覓得「宇宙能人異士」,吳亮星(個老朋友)既為「洗頭艇之父」,單係呢個名,已經係宇宙最強!
創意方面就更加係滿分!一個唔係高官、唔係議員,只係書店店東,竟要偷渡嫖妓,最後被拘,更無辜牽連中聯辦,累泱泱大國遭香港無知市民謾罵,劇情峯迴路轉到,恐怕連MK Woody Allen葉大導都諗唔到,齋聽更以為係《飛虎出征》續集《書局出征》!
即係咁,二次創作得精彩,都要有創意先得,吳亮星(個老朋友)絕對係鬼才, 貴公司真係可諗諗!搵唔到佢朋友?即係咁,「我朋友乜乜乜……」呢類開場白,大家一世人應聽過N次,你懂的,朋友呀嘛(拍拍膊頭)。

千頌C
http://fb.com/winbigwok
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載