› 選擇地區
三藩市
紐約
洛杉磯
其他美國地區
香港 台灣 北美
 
2016年01月06日

智取大市:信星硬淨後市有計 - 晉佳

中港股市中線恐偏向不利,有可能未來幾個月H股又係維持半死不生。 資料圖片

噚日中央忍唔住手干預股匯,證明如果唔出手,大陸金融市場就會失控,情況都幾牙煙,算係行緊比較不利嘅劇本。
未來幾日,中央有可能會向更多上市公司施加壓力,逼令上市公司自行禁沽,令官方禁沽令毋須延遲鬆綁,以穩定市場情緒。如果不幸言中,中線對中港股偏向不利,有可能未來幾個月H股又係維持半死不生,到時又係益咗殼股。
一批跟隨大市上落嘅股份,唔應該喺呢個時間接刀,尤其係處於風眼嘅金融股,同埋走勢轉弱嘅科網、電訊股。不過,散戶一手蟹貨唔願掟,近期肯沽貨都係大戶,所以港股二、三線股沽壓偏向有秩序,個別冷門股份更走勢唔錯。
少數能夠扒冷嘅股,包括信星(1170)。佢做運動鞋代工生產,旗下牌子比較出名有Skechers同New Balance,其中Skechers童裝鞋近年炙手可熱,信星泊呢個碼頭衰極有個譜。
信星截至去年9月底止半年收入升15.5%;純利升32.1%,至5,215萬元,估計個別客戶生意理想,令信星坐定定就接多咗定單,毋須大增銷售開支就能提高收入,同時利潤率得以擴闊,唔排除趨勢可以持續。
近期港股市況咁差,信星都跌唔穿1.8元,已算硬淨。及後市況難以估計,候低吸納較穩陣,待市況回穩,股價要突破去年2.25元,其實唔難。

晉佳
https://www.facebook.com/advanceguy1/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載