› 選擇地區
三藩市
紐約
洛杉磯
其他美國地區
香港 台灣 北美
 
2016年01月06日

遮打樂人:iBanker玩完? - 波叔

金融機構分bonus設限,iBanker工作更難捱。 資料圖片

剛離開從事超過16年的投資銀行。現時不用朝朝7點返到公司,不用日日揸住部blackberry睇那些無可能睇得完的email,最正莫過於不用再俾老闆捽數,總言之「爽」,成個人都輕鬆開朗了。最近跟舊行家、同事飲茶,他們知我離開投資銀行,都不知幾替我高興,個個都send個WhatsApp來恭喜我。
有趣嘅係,記得6、7年前我跟他們提過我想離開銀行去做自己想做的生意,他們個個當時都話我儍,高薪厚職,福利又好,出trip一定坐business class,又住5星級酒店,朋友介紹你的時候,總要提及你是那間投行,好似有個iBanker朋友好威,人人眼中的高尚行業,點解現在個個行家都覺得銀行玩完,夕陽行業、走得快好世界?

在我讀書時期,記得每年1月就成日在新聞、報紙講某某投行高層,獲派幾多幾多年花紅,平均Front office都分幾個月,所以我同自己講,讀完書當然做iBanker啦!非常好彩,畢業後真係入到投行,亦都見識過分幾年花紅的滋味,但呢個滋味只係維持到2008年。2008年金融風暴,真係吹冧了很多銀行,要消失的消失,有些要政府救亡,銀行股大散,樓價大冧,每個人都歸咎銀行「亂咁嚟」,搞亂全球經濟導致金融危機,銀行不斷推銷高槓桿高風險的產品來賺取最高收入,那些錢就去了班iBanker的花紅度,朋友介紹你的時候就會講佢就係成日sell「I kill you later」的那些iBanker,由高尚行業一下子變成無貢獻的行業,實在無癮。
眼見你班iBanker分紅分得咁happy,全球各國金融監管機構開始設法限制花紅嘅制度,今日的花紅就名副其實的bonus。有就真係bonus啦,無就繼續晨早起身返工啦老友。

我諗大家成日都聽到銀行被不同監管機構控告協助洗黑錢、造市、聘請商界、政府高官子女來換取生意上的方便,大部份最終用錢去解決,銀行被重罰,那裏還有錢去分紅,有錢都儲起來,點知過幾年又遇到甚麼危機。好多人講,錢可以解決到嘅問題就不是問題,以前投行工作時間超長,壓力大,老闆捽數「問候」,只要年尾有花紅就點捽都無問題。現在無錢,難怪各位朋友都覺得銀行有問題,夕陽行業,Game Over等等。

波叔
mailto:chaterhappyman@gmail.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載