› 選擇地區
三藩市
紐約
洛杉磯
其他美國地區
香港 台灣 北美
 
2016年01月07日

廣告經綸:車神 歌神 女神 - 文廸晞

駕駛嘅滿足感並唔係再在乎「快」,真正有power又有台型,非SUV莫屬。 資料圖片

對於車,我都算有些少認識。剛過咗嘅年尾,Mercedes Benz推出其SUV(Sport Utility Vehicle)家族宣傳。顧名思義,叫得做家族,即係一大棚、有大有細,一次過推出GLA、GLC、GLE等,今次唔係以一貫嘅A、C、E Class嚟打廣告,而係用產品特性嚟區別,的確有啲唔同。其對手BMW都一早有相對應嘅X系列,型號仲更齊,包括X1、X3、X4、X5、X6、X7(將於2018推出);Audi亦有Q3、Q5同Q7。
講到點解SUV咁popular,原因其實都唔太複雜。喺大陸,近兩年SUV嘅流行,係因為𠵱家啲人鍾意周末放假揸住架車穿州過省,去到邊食到邊瞓到邊,又越過高山又越過谷,如此無拘無束,自由浪漫,係現今富裕起來又想追求國外生活質素嘅一種新模式。然而,喺香港又係咩一回事呢?香港人多路窄,揸住架又高又大嘅車入彎唔方便,個車位細啲都泊唔到,既無山可以爬,又冇嘢可以越。香港人,對於SUV,我相信,係從心態而唔係生活習性出發。如果要多啲空間感,一家人坐得舒舒服服,買架7人車咪仲實際。SUV可以畀到香港人嘅係一種優越感,代表身份、代表品味、代表個性。所以,連一啲出名專注做開跑車嘅高檔品牌,例如Porsche、Maserati都會相繼推出更多嘅SUV。可見呢個家族,真係大有作為,成為2016車界之神。

從SUV,可以嘗試窺探一下港人心態。揸得SUV,一定有番咁上下,我意思係除卻錢之外,仲有對生活質素嘅要求,話你知,駕駛嘅滿足感,並唔係再在乎「快」。真正有power又有台型,非SUV莫屬。SUV令我想起Eason、謝安琪。兩個都結咗婚,識品味,一個歌神、一個女神,完全係將「實力」與「偶像」融為一體。然而,「實力」多定「偶像」比重多啲,我認為並唔重要,樂迷朋友買嘅係一個配套。選擇偶像同SUV的共通點往往都係睇咗樣先、靚唔靚仔,然後再追加話實力表現點樣才是核心云云。在這個「購買」過程,明顯係感性先行過理性。

文廸晞
mailto:heyadmen@gmail.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載