› 選擇地區
三藩市
紐約
洛杉磯
其他美國地區
香港 台灣 北美
 
2016年01月20日

中環在線:沈聯濤開金管局玩笑
「伯南克係陳德霖波士」 - 李華華

伯南克(左)同沈聯濤兩大財金界猛人聚頭,當然唔少得握握手。

一連兩日嘅亞洲金融論壇,華華覺得最重量級嘅嘉賓,要數噚日午餐演講嘅美國聯儲局前主席伯南克,會展新翼Grand Hall好耐都冇見百幾圍聽眾,就知墟冚。
演講以對話形式進行,主持人證監會前主席兼現任中銀監首席顧問沈聯濤(Andrew),亦係份量十足嘅金融界猛人,兩人雖已退下火線,但在台上妙語連珠,引經據典,確係高手過招,非同凡響。
聯滙機制下,港元港息跟住美國走就係人都知,估唔到做過金管局副總裁嘅Andrew,一開波就幽現任總裁陳德霖一默,笑住望向台下嘅陳總話:「其實香港欠咗伯南克,因為佢先係run緊金管局,佢係陳德霖先生嘅波士!」嘩,咁敏感嘅話題,睇怕只有Andrew呢啲高人,先拿揑得好笑又唔失禮。

相關新聞:中環在線:千嬅淡定講英文

指香港欠咗伯南克

伯南克2006年接替格林斯潘執掌聯儲局,任內爆發金融海嘯,佢推行史無前例嘅量寬政策,零息效應下,1,300億美元資金湧入本港,令本地資產樓價飆升,諗落Andrew呢個笑話亦有道理。
退休後,伯南克撰寫回憶錄《The Courage to Act》,沈聯濤開場白話,面對危機,有人懼怕回應,亦有人勇於行動,伯南克肯定係勇敢嘅行動派、超現實主義者同創造家。
見慣風浪嘅伯南克,發言亦字字珠璣,佢話今日中央銀行家,可以用嘅調控工具有限,總之做咗決定就承擔責任,「no excuse,no explanation」。央行施政固然要保持適度透明,但佢又補多句,話有時透明過頭,好似搞到TV成日影住聯儲局個會議室就多謝晒嘞!

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載