› 選擇地區
三藩市
紐約
洛杉磯
其他美國地區
香港 台灣 北美
 
2016年01月28日

女神tea time:後樓市瘋升時代 - Fifi

過去的樓價瘋升已經確定一個事實,就係往後樓價升又死,跌又死。 資料圖片

向西村上春樹又爆seed,一篇《環海.東岸業主的十年》網上潮文瘋傳,睇到香港有殼冇殼業主個個欲哭無淚。
簡單講,個故仔係話主角買咗環海.東岸,踏上供樓呢條不歸路;之後樓價跌到趴街,女朋友有咗要奉子成婚。2025年個仔返學,呻同學仔公屋靚過自己屋企,想掟個仔落街又怕變凶宅,結論係「你錯在唔係窮,而係唔夠窮」。
個故事荒誕得來其實好真實。事實係香港樓市之前瘋升,已造成唔少畸形家庭問題。唔知幾時開始,兒子上車靠父幹,置業要跨兩代,冇金鎖匙青年前景黯淡。男女談婚論嫁先決條件係要有樓,你身邊聽過幾多對男女朋友,最後因為冇樓鬧交結唔成婚分手?價值觀錯晒。最誇張係身邊識唔只一對新婚夫婦,婚後各自住返娘家。原因係租樓貴,但又買唔起樓,又或者係覺得樓價隊梗,唔知佢隊到幾時,未係入市時機。
過去的樓價瘋升已經確定一個事實,就係往後樓價升又死,跌又死。一石激起千重浪,樓價急跌唔只令香港經濟震盪,更慘係令社會出現更多畸形問題。如果政府未來唔認真處理震盪帶來嘅金融以至社會問題,一味講老遠嘅一帶一路,香港聽收皮。

Fifi
http://www.facebook.com/lovefrystock
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載