› 選擇地區
三藩市
紐約
洛杉磯
其他美國地區
香港 台灣 北美
 
2016年01月28日

中環在線:里昂風水指數今公佈
野村、安信搶閘用玄學講股 - 李華華

野村同安信兩間證券行,搶閘喺里昂發表風水指數前,用玄學講股。

港股俾A股與索羅斯嘅言論夾擊,投資者冇啖好食,證券行喺呢個時間出報告叫人入市,應該都好難搵到實質數據或基本因素支持,想突圍而出惟有搞gimmick。年近歲晚,最就手當然係以風水講股喇,今日公佈嘅里昂風水指數喺市場最出名,有兩間證券行就搶閘出類似嘅報告喎。

野村:避開金融股

野村證券近日向基金客戶出咗一份由玄學家周漢明預測嘅猴年投資貼士。聞說周師傅有幫荷蘭銀行、花旗等大企業睇風水,佢幫野村做嘅預測話,猴年女性運勢比較好,油價夏天會造好,金價就要等到10、11月先走強,港股整體穩穩定定。
佢預測,港股最差月份係西曆1月、2月同10月,尤其10月8日至11月8日,料「市場將會大幅調整,10月金價走強但股市轉弱」。你可能會話,10月係傳統股災月,咁估有乜出奇,不過都希望唔好發生喇。個別行業方面,周師傅叫大家避開金融、珠寶、鐘錶、零售股,應該唔使多作解釋了吧。
中資行安信國際亦都唔執輸,其「朱江團隊」預計,猴年屬金嘅金融、黃金業將會整體回暖,屬火嘅電訊業亦會蓬勃發展、競爭激烈。最弱嘅係屬水嘅交通、酒店、旅遊業。文中仲勸人提防小範圍嘅地區衝突,事關馬騮特點喜歡稱王稱霸,不斷挑戰權威。
至於最有江湖地位嘅里昂風水指數,就會今日公佈,不過,佢除咗喺1992年頭炮成功預測恒指7個轉捩點,震動江湖之外,以後多年嘅準確性都係一般。不過都係嗰句喇,風水唔係精密科學,純屬參考,以風水講股,都係應節搞氣氛,作為另類參考啫。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載