蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年02月03日

中環在線:活化觀塘工廈 用七年心機終入伙
舖王波叔攜妻兒現身 - 李華華

舖王鄧成波(右)一家罕有亮相。

人稱「舖王波叔」嘅殿堂級投資者鄧成波,近年都養尊處優,甚少出席一啲公開活動(或者臨時缺席)。但佢噚日就冒住嚴寒天氣,為自己持有嘅觀塘興業街4號全幢活化工廈舉行開幕禮。
已經81歲嘅波叔,噚日朝早10點現身大廈開幕禮,由於氣溫只得攝氏9℃,波叔着住大褸、帶埋冷帽,做足禦寒措施。今次波叔罕有現身,同場除咗有最得寵嘅孻仔鄧耀昇(Stan)之外,連極少會出現嘅波嫂(Stan嘅媽咪)都有登場,可見波叔對呢幢活化工廈幾咁重視。
呢幢大廈喺2009年以1.78億元買入之後,申請活化成商舖與寫字樓用途,改建費超過1億元,擺咗7年心機落去終於入伙,所以波叔特別錫住呢幢物業。

寄語市民2018才上車

有一排冇見嘅波叔,睇落比之前老咗少少,但係仲好精神兼精靈,期間仲同Stan喺大廈其中一層商務中心嘅休閒空間,扮打韆鞦,童心未泯。而佢一講到樓市就更加滔滔不絕。波叔話:「早喺兩年前我已經話樓價太高,叫咗後生仔唔好買細單位,嚟緊呢兩年樓市都會慢慢調整。」佢又寄語一班想買樓嘅後生仔,「𠵱家都係唔好買樓住,2018年先至好上車」。
講到舖市,佢認為繼續跌租係大勢所趨,不過如果佢睇啱,都會買貨嘅,好似舊年底以近8億元買入嘅荃灣海濱廣場,月內就會完成交易。
負責興業街4號嘅Stan就話,項目約租出兩成,呎租由50至150元,9至11樓共提供500個工作座位與50個工作間,主要租畀時裝設計師創業,租金由1,500元起。

靚靚新抱陀住B捧場

鄧耀昇(Stan)係舖王波叔嘅第五仔,亦係孻仔。舊年底Stan嘅靚女太太葉靄璇(Vicky)有喜,波叔就快做阿爺,當然萬千寵愛在一身。噚日Vicky都有同老公一齊出席興業街4號開幕禮,而且仲帶埋爸爸(即係Stan外父)到場。Vicky喺衣着上特別花心思,用條頸巾遮住巨肚。
Stan近年同太太Vicky拍住上一齊大搞婚禮統籌公司「拉斐特」,估唔到工廈開幕,Vicky都咁捧場。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載