› 選擇地區
三藩市
紐約
洛杉磯
其他美國地區
香港 台灣 北美
 
2016年02月04日

中環在線:為港交所3年戰略解畫
小加鹹魚論回敬Webb - 李華華

有「股壇長毛」之稱嘅David Webb前日發炮批評港交所(388)行政總裁李小加嘅新3年戰略計劃,真係夾埋都冇咁啱,李小加噚日發表網誌,劈頭第一段就話,對個3年戰略計劃,「有朋友表示困惑……在此,請聽我慢慢道來」,結果就用咗超過4,000字去講解。

對白出自《少林足球》

華華學咗某人嘅速讀神功,好快就由第一段,睇到落最尾一段,發現成篇文最精警嗰幾句就喺最後一段。李小加話:「敢想才能敢拼,沒有夢想,何有未來?」最後佢仲套用港產片嘅一句經典對白:「做人如果沒有夢想,跟鹹魚又有甚麼分別呢?」做結尾。
呢句經典對白出自周星馳主演嘅《少林足球》,戲入面嘅星爺身懷「金剛腿」絕技,但一直懷才不遇,直至佢諗到將少林功夫加足球呢條好橋,於是四出搵番昔日學功夫嘅師兄弟,鼓勵佢哋組軍踢波,創一番事業。
當星爺見到已轉做酒廊員工、身懷「鐵頭功」絕技嘅大師兄黃一飛鬥志全無,就同對方講:「做人如果無夢想,同條鹹魚有咩分別呢?」可惜李小加呢篇文嘅英文版,冇繙譯到周星馳呢句經典對白,否則,華華相信鬼馬嘅David Webb一定會送番條靚鹹魚畀李小加,當係拜年。
話時話,李小加的確熱愛足球,經常跟港交所同事一齊踢波,又不時約外隊作友誼賽。佢同星爺一樣都係踢前鋒,同佢踢過波嘅人就話,見唔到李小加施展「金剛腿」絕技,但佢嘅「鐵頭功」就幾有功架喎。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載