› 選擇地區
三藩市
紐約
洛杉磯
其他美國地區
香港 台灣 北美
 
2016年03月05日

【一代燈師】
沈大師:誓要去 入高登

就算係一個演員,要成功突圍而出,做到無人不識兼入屋已經唔易,更何況係一個財經演員?不過可以肯定嘅係,沈大師,佢做得到。

提起沈大師,你可能會諗起幾句網上名句,「有大師冇窮人」、「參透實戰理論全家就不會窮」,又或者,諗起網上大量改圖!咁樣睇,叫大師做「網絡最紅財演」一定當之無愧。憑咩?憑佢燈嘅形像。

「講真我又唔驚高登仔插我,插咗咁多年,化左啦,仲嬲咩呀。」大師表示,自2006年起,就開始被網民封神,仲要係燈神,甚至有人為印證佢燈力驚人,以數據分析佢預測後市的「準繩度」(邊方面準繩度?你憧的)。對於此,大師提起時,仍Feel到佢有少許火滾,「香港唔用腦嘅人真係好多,一睇呢啲數據就當係真,你要做一個用腦嘅人,唔係做豬吖。」認為數據分析有欠全面,硬砌佢唔準。

正所謂,有立場先有市場,對於點解成為高登仔目標,沈大師睇得通透,「如果你記得我07年講,直通車唔會行到架,但全個市得我一個人咁講。人人都話直通車行,得你話唔行,你話點解我成為眾矢之的,就係呢個原因。人地搵梗錢時,你阻人發達,呢啲係我死罪。」

自言宏觀分析有一向有八至九成準嘅大師,雖然一直被視為「燈」,不過大師仍然有堅持,有態度,拒絕模稜兩可的投資分析,不怯於表達明確方向,「講真,你驚人地搞你,你咪縮,縮你就冇咗個立場,咁你就同其他財演一樣冇分別。」

網絡抽水方式層出不窮,大師可以一笑置之,不過今時今日,連大師都認為,係時候要變啦!

佢指出,自從與蘋果炒鑊勁後,佢亦有反思過自己係咪同網絡脫節,於是自9月開始日日睇Youtube,司徒夾帶啦、玩爆你個腎等,連劉馬車都睇,「嘩!劉馬車喺度講乜野,但你唔好理,好多人Like架!於是我就諗,會唔會真係人老左啦,有代溝。」

於是,一眾YouTuber,就令呢位成為財演20年嘅沈大師,發現新大陸,決定走入網絡,融入高登,考慮成為YouTuber。

大師指出,現時後生一輩炒股太即食,欠缺長遠目光及忽略不少基本因素,因此希望利用網絡,灌輸傳統嘅投資思維俾後生他,將佢嘅投資技巧流傳開去,「所以我會逐步融入高登,跟住再反洗返佢地腦,所以高登仔唔使key我相啦,我自己影俾你。」

記者:倪敏慧 攝影:陳家文

相關新聞:【一代燈師】我唔係方丈-沈大師「蘋果恩仇錄」

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載