› 選擇地區
三藩市
紐約
洛杉磯
其他美國地區
香港 台灣 北美
 
2016年03月18日

中環在線:6月舉行 講金融市場爛gag
黃國英開騷抄星戰 - 李華華

黃國英揸激光劍影海報,宣傳自己嘅talk show。 

一向金句多多嘅豐盛金融資產管理董事黃國英(Alex),鐵定今年6月11日捲土重來,再喺灣仔伊館舉行talk show,噚日佢喺社交網站上載咗初步宣傳海報,玩花臣,搞二次創作《星球大戰》,主題又叫做「財力覺醒」,不過呢個海報似乎爭啲氣勢,兼且有些少山寨feel,唔該執執佢。

市靜怕門票滯銷

Alex以星戰做talk show概念,主要因為佢旗下基金重倉持有迪士尼股票。海報上,Alex着住老西揸激光劍,再襯宇宙背景,十分搞笑。Alex話,呢個海報只係初步設計,會再做後期整理。
講番個show,佢由2013年起連搞兩年,但發覺成件事太過困身,於是舊年停辦一年。累積兩年嘅金融大事,𠵱家諗gag反而易咗。
佢認為,寫劇本唔難,反而因為近排市況好灰,即使門票下月先至公開發售(每張300蚊),佢家陣已經擔心滯銷。
佢會送600張門票畀客戶,賣過千張左右,到時肯定唔會冇人去睇,但係門票滯銷始終肉酸,所以佢未度好講稿,𠵱家就度橋宣傳,暫時吸睛亮點係搵到航空公司贊助黃金海岸機票,現場舉行抽獎。
今次talk show題目係「財力覺醒」,Alex話,因為市場已經開始對個市冷感,所以要「覺醒」,佢認為,唔少香港人仲係冇乜理財sense,希望大家唔好除咗買樓,就冇其他投資,投資乜嘢,就要入場睇囉。佢個show上半場會搞金融市場爛gag,下半場先講投資,再利用口訣,教大家長線投資操作。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載