蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年03月22日
馬上成為壹會員

金手指:點解揀特朗普 - 孫柏文

特朗普賣點只有一個,就係佢係建制摧毀者。 資料圖片

今日孫柏文同大家講吓花旗國。今日要講嘅原因係因為當我同啲band1畢業、自視過高、因已變既得利益者產生嚴重罪咎感之左膠港女,傾起花旗國共和黨揀總統選舉候選人時,佢哋清一色都話:「美國人啲無知都好嚴重,特朗普呢個種族、性別歧視主義者,居然可以領先。真係唔可以接受。」
我先撇除呢班港女覺得民主選舉結果唔可以接受呢件事,再唔講佢哋見到我話:「來抱抱」同見到一個鬼仔話:「Give me a hug」嘅反應分別。佢哋實在對花旗國現狀太唔清楚,所以我要點醒吓佢哋。
特朗普係有好多缺點,不過大家再列出來都係對特朗普啲支持者冇影響。唔係因為佢哋係文盲,而係特朗普賣點得一,就係佢係建制摧毀者。
每次我對住嗰啲港女講到呢到,佢哋就會進入港女「我唔聽」狀態。因佢哋深信,一個靠玩現有制度,仲要再婚時連希拉莉都係賓客嘅建制既得利益者,點會係建制摧毀者呢?
特朗普開始吸引啲支持者,源自被問到請希拉莉去婚禮單嘢。佢解釋:「希拉莉來到賀係因為我畀咗錢佢囉!」有如將呢位前國務卿等同佢婚禮請嘅樂隊一樣。
因花旗國國民好多都覺得兩黨之間根本冇分別,都係被權貴控制,即係特朗普透過佢呢個答案,講畀選民知佢根本唔使參選,兩黨之間邊個贏,到最後都係佢呢啲人控制。佢參選嘅原因係連佢都睇唔過眼,要替人民行道。佢就係嗰個建制中倒戈嘅超級英雄!建制中禍害最深、識嘢就知要摧毀嘅,一定係儲局為首嘅世界貨幣秩序。喺今年咁多個花旗總統候選人當中,我深信真係明白貨幣政策嗰個,就係做地產嘅特朗普。佢舊年年中上CNBC被問時一句答:「現有嘅零息政策,受惠嘅只會係我呢啲有財有勢嘅人,根本幫唔到平民百姓。儲局一定要推翻!」憑呢個答案,你明點解咁多人支持佢啦。

孫柏文
獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載