› 選擇地區
三藩市
紐約
洛杉磯
其他美國地區
香港 台灣 北美
 
2016年03月22日

Money Walker:
孝順先叫阿媽坐艇 - El.

中國行番谷內房支持經濟嘅舊路,加上油價因為憧憬石油生產國減產而反彈,刺激師奶最愛嘅澳元翻生。
澳元由今年1月中嘅低位起計,至今已經升咗接近5%,兌港元就快掂到6算。唔少人都認為澳元只係短線反彈,包括筆者自己,仲有專家建議趁澳元反彈就好快啲走,換馬去啲優質收息藍籌。不過筆者認為對於一眾買咗澳元坐艇嘅師奶嚟講,呢個策略未必適用。

師奶買澳元就係貪佢夠穩陣同簡單,始終買藍籌股又未必夠錢買,而且今時今日好多藍籌股都唔見得有幾穩陣。
做澳元定期,少少地一萬幾千蚊入場就得,而且澳洲破產嘅風險,理論上點都低過一間上市公司破產嘅風險。更重要嘅係,做澳元定期有幾厘息收,就算今時今日澳洲係咁減息,澳元定期都仲畀到一厘息你。喺負利率嘅世界,有一厘息收可謂相當幸福。
除咗澳元,仲有乜嘢投資集齊上述優點?就係紐元,可惜影響紐元嘅因素同影響澳元嘅因素好相近,所以換馬去紐元冇乜意思。

作為一個師奶,如果唔等住拎筆錢出嚟用,買澳元純粹係收息抗通脹嘅話,筆者覺得繼續做澳元定期都冇壞。
畢竟香港藍籌股已經今時不同往日,20、30年前正值香港經濟起飛期,買藍籌股真係可以做到資本增值,但金融海嘯後嘅時代,香港已經變成一個唔適合價值投資嘅地方,優質藍籌有就有,但真係唔多。與其叫阿媽由澳元換馬藍籌股,作為仔女我寧願叫佢繼續坐艇,總好過阿媽亂買着隻不知所謂嘅藍籌。畢竟澳元會跟澳洲經濟周期走,跌完總有升番嘅一日,但沒落咗嘅藍籌股就唔會。

El.
本欄逢周二、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載