› 選擇地區
三藩市
紐約
洛杉磯
其他美國地區
香港 台灣 北美
 
2016年04月07日

操盤手札記:九建派息夠豪 - 割柑人

舊年今日,A股收報3960,逼近4000,新華社發表題為「風口上的中國股市」文章,肯定該輪牛市之合理性;翌日,即市突破4000,新華社再發文「政策紅利催生改革牛」;兩星期後,《人民日報》更撰文「4000點才是A股牛市的開端」。官媒藉輿論挺股市,結果股市暴升暴跌,阿爺不斷出招救市,至今仍有手尾跟。大時代一周年,感慨良多!
講開官媒,今個星期最爆嘅新聞莫過於史上最大洩密事件──巴拿馬文件,官媒低調對待,皆因文件揭露上百名各國政商權貴利用離岸公司避稅,中國國家主席習近平姐夫鄧家貴亦捲入其中。大陸媒體噤聲就預咗,估唔到東蘋明星信經等本地主流報紙都無一做頭條,令人欷歔!

股息率達8.1厘 講

講番股市,恒指周二跌破3月29日低位20250的小雙頂頸線,昨雖微升29點至20206,但仍在頸線之下,小心後市朝小雙頂量度跌幅目標19628進發。我就繼續喺績優股中尋寶,雖然我係好息之徒,但揀股唔係齋睇派息,仲要睇營運數據,近日心水係九龍建業(034)。
九建從事地產投資、發展及物業管理,業務遍及中港澳,老闆係人稱「澳門李嘉誠」嘅柯為湘。早前公佈2015年度業績,營業額按年增加27%,純利增長16%;扣除投資物業重估收益,基礎純利增長4%。過去3年,每股盈利分別為1.12元、0.9元、1.04元,每股派息為0.57元、0.57元、0.58元,派息比率達51%、63%、56%,對得住捧場客。

九建土地儲備豐厚,年初又向控股股東保利達控股收購將軍澳地皮,料將帶來可觀利潤,繼續支持派高息。該股近日表現強勢,只要市況配合,有望展開新一輪升浪。現價7.12元,市盈率6.9倍,股息率8.1厘,高過晒以高息見稱嘅內銀股,可候低吸納。
內銀嘅高息係糖衣毒藥,若揸到滿手貨,就宜減持。據講,擺明搵內銀笨嘅債轉股方案,最快本月推出,首批規模1萬億元人民幣,工行(1398)、中行(3988)、招行(3968)等做白老鼠。
明日又到Happy Friday,兼且七人欖球賽開鑼!滙豐研究部曾經用佢哋嘅龐大資料庫分析,發現七人欖球賽果同港股有些少關係,就係太平洋島國薩摩亞(Samoa)贏嗰年,恒指就會升,2007年、2010年都係咁,今年梗係望佢贏啦!

割柑人
本欄逢周四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載