› 選擇地區
三藩市
紐約
洛杉磯
其他美國地區
香港 台灣 北美
 
2016年04月20日

一周三件:中機械超值價 - 錢雋

食住「一帶一路」條水,估計中機械今年經營業務盈利增長15%。 路透社

中國機械工程(1829)持高達285億港元淨現金,超過晒本身總市值。現價買中機械,未嚟得切反映集團每股淨現金值之餘,更未有耐反映到核心業務價值。中機械要翻半番,實際經營業務PE,先追到行家,係超抵搞!
中機械主打國際承包工程,阿媽中國機械工業集團,直屬中央管理,係架勢堂級數。中機械到上年尾揸淨現金285億港元,超級現金牛之餘,淨現金兼高過成間公司總市值233億元。即係話,以現價5.63元買一股中機械,已經等於揸住集團每股6.91元淨現金!中機械單係反映每股淨現金價值6.9元,現價已經講緊要升23%。
仲要咁睇,中機械現價低過每股淨現金值,即係現價連經營業務價值,都未真係反映到。中機械上年盈利20.5億元人仔,扣咗包括利息收入等財務性收益10.7億元人仔,真正嚟自經營業務盈利嘅10億元人仔,折約12億港元。

一帶一路助業務增長

保守計數,食住「一帶一路」條水,中機械今年經營業務盈利增長15%,到近14億港元。又由中機械每股淨現金值3.6元開始,冧多3蚊上去,就當呢3蚊,先係反映中機械主打瓣數價值。
呢3蚊嘅額外新增市值124億元,對應上邊預測中機械今年經營盈利12億港元實際PE,都係得8.8倍,貼近場內同樣食住「一帶一路」嘅近磅基建行家,包括中鐵(390)今年預測9.7倍PE、中鐵建(1186)8.4倍預測PE水位。而中機械呢每股額外冧多3蚊價值,現價係要升53%,到8.65元。

錢雋
細價股專家
本欄逢周一、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載