› 選擇地區
三藩市
紐約
洛杉磯
其他美國地區
香港 台灣 北美
 
2016年04月20日

中環在線:郭思治重學詠春
師傅係葉問徒弟 - 李華華

郭思治近排再學番詠春,睇落果然有姿勢。 受訪者提供

股壇大隻佬、耀才證券(1428)市務總監郭思治(郭sir)鍾意玩健身就係人都知,咪以為佢淨係玩呢類陽剛味濃嘅運動,原來郭sir連詠春都識。
年過花甲嘅郭sir噚日食晏時講起,佢喺30幾年前已經拜師學詠春,佢師傅更加係大有來頭,係葉問嘅弟子陳衛匡師傅,咁佢咪應該已經係大師級?謙虛嘅郭Sir話,如果同金融界另一詠春高手、國藝娛樂(8228)主席冼國林比較,佢只係小學級數,冼師傅就係教授級咁話。

睇電影燃起功夫癮

眾所周知,冼師傅師承葉問兒子葉準,按道理,郭sir與冼師傅都係葉問嘅徒孫,二人嘅功夫點解會相差咁遠先?
郭Sir解釋話,佢後生嗰陣,學詠春只係學咗一段好短嘅時間,之後因為工作關係暫停,近年睇番《葉問》系列電影,先至挑起條根,舊年重新再學詠春。
佢仲專登搵番陳衛匡師傅,雖然陳衛匡師傅已經80幾歲,家陣唔會親自教詠春,但郭sir搵到當然另計喇。工作忙碌嘅郭sir話,𠵱家最少一個月上兩次堂,可以就再上多啲。
咪見郭sir平日講股好淡定,原來佢一練詠春就好忘形。話說有日佢自己用木人樁練詠春,點知越練越投入,唔識收力,結果沖涼嗰陣見到浴缸有血,先知道原來自己兩隻手都打到傷晒。據郭sir形容,嗰次並唔係普通皮外傷,而係傷到爆開有血有肉嗰隻,真係聽到都毛管戙。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載