› 選擇地區
三藩市
紐約
洛杉磯
其他美國地區
香港 台灣 北美
 
2016年04月21日

智取大市:冚檔太密大限或至 - 晉佳

如港股炒高再冚檔頻密度越高,證明淡友勢力開始加強,大市下跌動力就更大。 資料圖片

美股周二晚企得穩,但港股一開市已經唔升,然後逐步跌,繼周一後,唔夠一日半,港股再冚檔。大家半信半疑,究竟走完鬼會再升過,定係真跌市來臨?
有兩樣嘢大家必須留意,第一,如果炒高再冚檔殺好友嘅頻密度越高,就證明淡友勢力開始加強,甚至有超越好友之勢,下跌動力就加大。第二,美股道指穩守萬八繼續升,但港股連高開嘅奶力都無,證明港股弱過美股。呢兩點顯示調整壓力增加。之前炒一、兩個星期先嚟冚檔一次,短線至少有兩、三日搵食,𠵱家變咗升一日半唔夠就冚檔,追慢啲都摸頂,想贏都難,邊個再敢博?

再講,係跌市定調整呢?唔好一口咬定港股調整唔會深。
讓數據說話,由2010年至今年,除咗2014年第二季零舍好景之外,其餘年份嘅第二季,由高位計都會出現2,700點或以上嘅跌市,如果今年唔例外,又咁唔好彩上星期21511點已經見頂,跌夠2,700點,就隨時跌破19000點,甚至破底。所以形勢逆轉,要跌幾深,唔好估,咪以為唔慌跌得多就隨便撈底。反彈浪見頂,調整浪係用嚟測試港股嘅中長線承接力,係風險、亦係機會。小弟並不悲觀,大跌有低位撈貨博大反彈,如果咁好彩跌唔多,市底強證明後市有前途,肯定一浪高過一浪,邊個劇本之下,下半年都有賺錢機會。有激情係好事,總好過對住一條死魚。

晉佳
http://facebook.com/advanceguy1

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載