› 選擇地區
三藩市
紐約
洛杉磯
其他美國地區
香港 台灣 北美
 
2016年04月21日

唔見數簿皆因倉庫執笠
創板公司報警求助

近年久唔久都會聽到一間半間上市公司,話公司文件唔見咗,然後就「順理成章」地出唔到業績,或又其他嘢。

智易(8100)最新亦不幸唔見文件,最新公佈,話公司租用去存放文件和記錄嘅倉庫執咗笠,而相關資產已不知所蹤。公司就聲稱,「曾多番嘗試但仍未能與倉庫擁有人取得聯絡。」仲認真到,已經喺本周一報警。

相關文件主要為集團截至2013年12月底止財政年度以前之會計記錄,以及若干過時的公司文件。董事認為,事件將不會對集團整體營運造成重大不利影響。

市場傳聞指,曾為智易控股獨立非執董的葉志輝,為「翠如BB股」聯旺(8217)背後Big Boss。

查實唔止智易咁「不幸」,去年底,中國動物保健品(940)份2014業績同樣「疑似」受詛咒。

公司去年3月公司公佈,核數師遲未能出具2014年審計報告,股份去年3月起停牌至今。公司去年底公佈,話本來已準備2014年及2015年所有財務文件正本,喺上年12月3日,文件已裝上貨車,準備運去石家莊辦事處。

不過當日貨車突然壞車,要拖走維修;貨車司機第二日,拎返架車後去附近餐廳食晏,點知架車竟然俾怪盜偷咗!中國動物保健品當時不但報公安,仲話會成立特別調查小組。

至12月12日,公安話架車就搵返,不過文件就冇晒!公司當時打定輸數,話搵返文件嘅機會不大,要再延中國動物保健品公佈業績嘅日期。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載