› 選擇地區
三藩市
紐約
洛杉磯
其他美國地區
香港 台灣 北美
 
2016年04月21日

中環在線:協盛有意收購訊匯
葉家寶撈多瓣 沈大師驚被炒 - 李華華

唔知幾時開始,越來越多股票行上市,網上人氣極盛嘅沈大師沈振盈效力嗰間訊匯證券嘅CEO,亦有機會上市,但就唔係自己申請上市,而係想透過借殼形式上,不過對於公司可能成為上市公司,大師話反而驚俾人炒喎。

仲想買埋《足球小將》

協盛協豐(707)最新公佈,同訊匯金融集團簽咗份諒解備忘錄(MOU),以收購萬方國際60%股權,咁萬方國際又持有訊匯證券100%股權,簡單啲講,即係將六成訊匯證券上市,華華第一時間打去恭喜大師,不過大師話,「第一,今次係收購間公司,唔係收購我,我只係打工仔」。跟住佢仲講笑咁話,唔少公司控股權易手後都會炒舊員工,因此佢都有中年失業嘅危機喎。
由於只係簽MOU,一切未落實,連作價都未有,但市場已經有好多憧憬,其中有人話假如交易成事,協盛協豐外號是否應改為「振盈BB股」,一向講得笑嘅大師話,翠如BB股日日升,升到冇譜,咁如果第時有公司叫振盈BB股或振盈BB系,咁跌咪好大件事?佢仲話,「振盈BB係燈神,翠如BB係女神,兩樣唔同㗎」。
或者介紹番協盛協豐,之唔係家寶BB葉家寶入咗去做CEO、早前配股集資想話借畀亞視嗰間囉,本業做紡織嘅協盛協豐積極尋求變身,單單今個月已經簽咗三份唔同嘅MOU,除咗買訊匯,協盛協豐之前仲話想收購日本動畫《足球小將》、《銀河鐵道999》的製作商,同埋黃玉郎漫畫《天子傳奇》的部份版權。提醒番,全部都係MOU嚟嘅。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載