› 選擇地區
三藩市
紐約
洛杉磯
其他美國地區
香港 台灣 北美
 
2016年04月21日

廣告經綸:可唔可以同你share? - 文廸晞

Temple紙巾賣堅韌得來又錫住肌膚,好友或情侶之間當然可以share,既環保又親密。 互聯網

紙巾可唔可以share?食飯抹嘴,自然要用紙巾,好似Temple紙巾賣堅韌得來又錫住肌膚,好友或情侶之間當然可以share,既環保又親密。但有次喺茶餐廳搭枱食飯,對面坐了一對小情人,點了個咖喱豬排套餐,邊食邊share一張紙巾用(並不是一張紙巾平均撕開一人一半或四層每人兩層),你抹完遞過去我抹、我抹完又到你抹嗰種,親密非常但卻極不衞生,也全不顧及他人感受,見到啲黃色咖喱汁越抹越多……到底想點?
又有次有位靚女同事,午飯時獨自去到一間以粥粉麵馳名的地道小店。她點了粥又貪心想食埋碟炒麵,但又生怕食唔晒做大嘥鬼。她問伙記可否改成小碟,答案好堅定,「冇」。
結果,由於饞嘴關係,佢主動開聲同坐喺對面又係一個人食lunch的OL講:「小姐,有冇興趣share碟炒麵?」對方好爽快,一口答應。那位OL 吃完先行,靚女同事從錢包抽出一張十蚊紙準備遞給她。OL答道:「下次先!」嘩!有如江湖女俠拔刀相助,手起刀落,多麼瀟灑流麗!
平時,我們常常都跟其他人share很多東西。例如share個personal hotspot、share個post、share麻辣火鍋 、share包大薯條,仲有share啲趣事同開心嘅嘢。share的中文是分享,也可以是分擔。分享的是樂事,而分擔的是憂愁。中文可以分辨,然而,英文一律用share,不論正面負面,開心唔開心,一個字用到尾。
而可以一起分擔的,就有如煩惱、壓力、家務、感情問題、工作。廣告都有賣:開心share瑞士糖,KFC燒脆雞桶餐可以share,可樂也時時刻刻同你share快樂;又有及時雨、邦民幫你擋風雨、分擔財困。
有冇諗過,我們每日同人share咁多嘢,當中有幾多是分享、又有幾多是分擔呢?可能只要不定期為自己粗略統計一下,就知道你最近到底開心多,定係唔開心多。
不過,點都好啦,起碼身邊仲有人可以同你share,無論是開心或憂愁,也總比獨自快樂或一人黯然神傷好得多。

文廸晞
mailto:heyadmen@gmail.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載