› 選擇地區
三藩市
紐約
洛杉磯
其他美國地區
香港 台灣 北美
 
2016年04月28日

智取大市:跟馬化騰好過馬雲 - 晉佳

騰訊有好嘢唔會收埋,小股東跟住馬化騰應該較有運行。 資料圖片

環球股市年初至今係弱者越強,絕對冇錯,你睇一批爛國企就知,只要夠殘就彈得勁,從基本因素分析,長遠未必睇到有曙光,但年初至今升幅卻屬前列。
弱者越強係不合理趨勢,始終會結束,資源商品股近期已開始出現強弱之分,例如安徽海螺(914)近期跑贏中建材(3323),原因係市場覺得後者重債到無可救藥。
騰訊(700)同美國上市阿里巴巴之間,亦有強弱之分。阿里肯定係弱者,股價由今年低位至今反彈三成,但騰訊只彈兩成左右,阿里暫時跑贏騰訊,只在於夠殘吧。
長遠嚟講,騰訊勝過上市嘅阿里,原因係騰訊有好嘢唔會收收埋埋,例如持有三成股權嘅微眾銀行,就係識生金蛋嘅互聯網金融業務。至於阿里巴巴上市公司,就唔包括最有潛力嘅支付寶、互聯網金融同「互聯網+物流」業務,然後用天價賣阿里健康(241)、阿里影業(1060)股票畀你,簡單啲講,馬雲死都唔會益小股東。呢個邏輯之下,一日支付寶未注入上市公司,互聯網金融一日未見頂,騰訊應續有運行。
觀乎港股之中,好似阿里呢類唔益股東嘅中國企業實在太多,騰訊呢類公平對待股東嘅上市公司實在太少,所以對於着重基本因素嘅外資而言,中資股之內實在難搵好選擇,呢個亦係中國股票喺海外只會繼續沉淪下去嘅原因之一。

晉佳
https://www.facebook.com/advanceguy1/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載