› 選擇地區
三藩市
紐約
洛杉磯
其他美國地區
香港 台灣 北美
 
2016年04月28日

中環在線:「秒殺」問答環節 極速離開
吳天海激嬲有線小股東 - 李華華

有線寬頻管理層包括主席吳天海(中)極速宣讀議案,15分鐘就散會。 朱永倫攝

有線寬頻(1097)雖然蝕咗8年錢,但旗下免費電視台「奇妙電視」攞牌有進展,令股東對公司有番憧憬,噚日有大班小股東去股東會捧場,點知每年有問必答嘅主席吳天海(Stephen),一反常態成為「武林大師」,一聽到問題就耍太極。
噚日有線股東會下午3點半左右開波,Stephen與一班高層,跟足規程,一輪嘴用英文宣讀議案,臨尾用英文問台下股東有冇問題,一見台下股東冇反應,好快就宣佈投票兼散會,成個會約15分鐘完成,快到呢。
台下有小股東想問公司業務發展問題,Stephen就話問答環節已過,又話有其他會議,就算傳媒走上前發問,佢都四両撥千斤咁話,「唔答住喇,喺(母公司)九倉(004)股東會先再答。」股東會一完就立刻離場。
之後財務總裁關則豪與公司秘書許頌瑛一度返回股東會會場,但宣佈完投票結果後,立即起身走人,冇回應小股東提問,令留喺會場嘅小股東一肚氣。
有小股東投訴,其他上市公司通常完成投票後,都會畀小股東就公司業務問題作出提問,有線卻未有相關做法。佢希望了解奇妙電視嘅定位、將來會否供股集資等等。

股東想問奇妙電視發展

另一名小股東孫先生亦指出,希望向管理層提問有關奇妙電視發展,未來會否將有有線寬頻私有化等等,但都難請吳天海「開金口」解答疑難。
一肚氣嘅仲有傳媒。公關日前主動邀請傳媒去採訪,點知最後係採訪空氣。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載