› 選擇地區
三藩市
紐約
洛杉磯
其他美國地區
香港 台灣 北美
 
2016年04月29日

Money Walker:經濟復蘇靠大蒜? - El.

2010年,內地食品漲價,大蒜、食油、白糖都走唔甩,因而衍生出「蒜你狠」、「油你漲」、「糖高宗」等潮語。呢堆潮語今年相信又會再度興起,仲有機會成為大陸經濟嘅絆腳石。
大蒜加價同經濟有乜關係?話說呢排大陸經濟數據好轉番,市場嘅憂慮亦都好似煙消雲散。不過呢個時候大摩突然殺出,提醒大家呢輪復蘇就快玩完。該行話今次復蘇只係由幣策、財策同房地產推動,預計去到今年8至9月就會開始放緩。
不過大摩亦戴番頭盔,話唔排除呢輪復蘇都有機會維持到24個月咁耐,指如果實質按揭利率進一步下跌,推動內房銷售復蘇由一線城市擴展至二線城市,本輪復蘇可能會維持更長時間。
講到尾,筆者認為復蘇可唔可以持續,都係要睇人行會唔會繼續放水,有水內房自然炒得起。而人行放水與否,又要視乎未來通脹會否過熱,如果通脹冇問題就會繼續放,咁樣今輪復蘇維持到一、兩年時間並唔出奇。
一般而言,喺經濟好差嘅時間,無論央行點放水,都唔會谷得起通脹,因為資金只會流入股票、債券等金融資產,而非實體經濟,最終炒起嘅頂多亦只係股價而非物價,日本同歐元區就係實例。但當情況發展到好似大陸咁,流動性氾濫,但資金又無法喺國際市場上自由流通,結果就係乜都炒一餐,就連大蒜同雞蛋呢啲日常食品都無端端炒貴,繼而增加出現惡性通脹嘅機會。
所以中國經濟復蘇持唔持續到落去,關鍵可能就係大蒜,倘若大蒜價格繼續狠升,人行就會減少放水甚至收水,意味着經濟復蘇亦咁上下玩完。

El.
http://www.facebook.com/moneywalkerhk
本欄逢周二、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載