› 選擇地區
三藩市
紐約
洛杉磯
其他美國地區
香港 台灣 北美
 
2016年04月29日

智取大市:港股兩個好現象 - 晉佳

若人民幣相對美元轉弱加快,可能會掀起新一輪走資。 資料圖片

日本央行冇進一步放水,刺激日圓滙價急升同時,亦震散咗日股,但即市港股只係升幅收窄,個別股份略為偏軟,冇大波動。今個月小弟一直強調,留意滙市係非常重要,噚日人民幣相對美元更加弱,若然人民幣加快轉弱,就可能掀起新一輪走資,對港股理應有負面影響。不過,大家似乎冇憂慮過呢個潛在負面因素,究竟係承接力強?定係市場太遲鈍未去反映負面因素?
喺大陸資本賬管制之下,近幾個月大陸資金主宰港股程度減低,此消彼長,外圍消息敏感度相當高嘅外資,主宰港股比例自然相對高咗,但呢一浸見滙市波動,暫時都冇話喪掟貨,睇得出大戶相當冷靜,亦可以解釋為大戶押注走資問題唔會重現,係好兆頭,但短期內仍要密切留意滙率走勢。
另一項偏好嘅徵兆,就係4月份只剩一個交易日,好大機會出現月線圖兩連陽。
回顧對上兩次熊市,即係2008年金融海嘯同埋2011年歐債危機,熊市途中,往往只能出現一支月線圖陽燭嘅短暫反彈浪,之後就繼續跌,今次月線圖能夠錄得兩連陽,有可能顯示港股長線走勢好轉。未來要尋找更多港股見底嘅證據,如果嚟緊嘅調整浪冇大跌,就可以積極入市,暫時堅持只持有基本因素理想嘅強勢股,且戰且走。

晉佳
http://www.facebook.com/advanceguy1

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載