› 選擇地區
三藩市
紐約
洛杉磯
其他美國地區
香港 台灣 北美
 
2016年04月29日

中環在線:
周松崗躁底:唔鍾意可唔買港交所 - 李華華

周松崗罕有躁底起來,語出驚人。 潘浩欣攝

港交所(388)主席周松崗平日四萬咁口,說話圓滑,估唔到躁底起來,都會語出驚人。噚日股東會上,小股東不斷質疑港交所點解力挺倫敦Metdist主席巴格瑞(Apurv Bagri)爭做董事,講到詞窮,周松崗爆出一句「如果你唔鍾意,你可以唔買呢隻股票。」

相關新聞:中環在線:稀客鍾絳虹介紹投票機

股東質疑偏幫巴格瑞

喺股票市場,佢呢句說話,客觀上冇錯,但係傷盡長情小股東嘅心,殺傷力可大可小。須知道股東會嘅作用,就係俾小股東向管理層提問,你唔盡力解答,反而叫人唔鍾意就沽,咩道理?東亞(023)主席李國寶2009年主持股東會時,都向小股東講過「唔鍾意可以賣咗東亞股票」,被人鬧爆。

噚日股東會備受關注,主要係由董事會提名嘅商品專家巴格瑞,與股東提名嘅資深對沖基金經理錢志健,兩人爭一個董事空缺。港交所早前罕有發通函,提醒股東要贊成巴格瑞、反對錢志健,惹來不公批評。
會上共9次股東提問,條條都追住周松崗問,點解咁唔公平,佢最初耐心解釋,係技術上需要,但有股東大鬧覺得被侮辱,「唔好以為你哋嘅智慧高過我哋小股東喎!」有人又要求主席向錢志健道歉。可能主席解釋到躁,就叫人唔好買囉。
會後,傳媒問主席會否收番呢句說話,原先佢都企硬,諗諗吓覺得唔妥,幾分鐘後主動補充:「如果被演繹成為叫佢賣股票,咁我收番呢句說話。」
而董事選舉係以贊成票減反對票得出結果,巴格瑞以3.73億股淨票數當選,錢志健得票係負數,結果一如預期。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載