› 選擇地區
三藩市
紐約
洛杉磯
其他美國地區
香港 台灣 北美
 
2016年05月09日

笑到最後:現場學股神「價值投資」 - 高明

在巴郡股東會,畢菲特多次講解唔同業務運作同前景。 資料圖片

因為工作關係,今年第一次去巴郡股東會現場,可能會有人覺得,今年開始,股東會直播,上網睇都得,唔使特登去,高明當然唔同意。
據畢菲特個大女Susan所講,股神一路唔肯直播,係因為佢驚有直播啲人唔會嚟。但正如黎明演唱會,有做臉書直播,大家仲係想入場。站喺股票愛好者角度,所謂「平生不見畢菲特,便稱炒股也枉然」。
至於身為記者,巴郡股東會就好似投資界嘅世界盃,《金融時報》、彭博呢類財經傳媒年年都會去嘅採訪活動。近年仲多咗好多中國傳媒,做新聞要參與,唔參與人哋就當你唔存在,亦都係因為中國傳媒年年去,所以股東會都有篇幅講中國股東,亦都睇得出畢菲特同巴郡員工較重視中國傳媒。當然,香港傳媒經費有限,冇得咁比較。
過去一直認為,股神已經變成一個生意人,嗰套「價值投資」,其實係冇得學,今次去現場睇,係印證自己的睇法。畢菲特首先唔當係股票,而係當生意咁買。出發點同炒股票已經好唔同。再加上佢一買,就係擁有成間公司咁去買,即刻去做莊,有別於我等散仔,買極都係做閒。而佢嘅原因係:睇中間公司嘅經營者,買晒成間公司,等於即刻可以擁有一個能幹嘅商業夥伴。股東會入面,畢菲特多次講解唔同業務運作同前景,似一個生意人講生意經,多過講股票。
就算好有錢,可以成間公司買起,亦都未必做到佢管理方法。因為佢話,基本上唔干預亦無指令子公司運作,表面證供大致可信。但係一般商人,特別係香港人,信奉一個「捽」字。心態嚟計,有錢都學唔到。
股東會第一條問題,係記者引述80年代巴郡年報話,畢菲特一向買開小生意,或者係一啲唔使點投資新錢入去嘅生意,但係近年就做多好多資本密集嘅生意,例如鐵路或新能源,質疑佢係咪打倒昨日的我。總結畢菲特回應就係「時代變咗」。就連股神都轉玩基建股、新能源股、公用股,銀碼大到一般富豪都冇得學。
巴郡已經大到唔係一個炒股票規模,而係一個生意規模,客觀環境令到畢菲特更似一個生意人,多過一個投資者。唔怪得人哋問佢買乜股,佢都係建議人哋買標普指數基金。真係要模仿畢菲特「價值投資」,只有兩個方法:一、直接買巴郡股票;二、佢買邊間公司你照跟。

高明
https://www.facebook.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載